「蘭花系」參選 助毓民布陣
近期激進團體紛紛湧現，鬥激鬥出位，其中以粗口諧音起朵嘅「調理農務蘭花系」，於旺角晒馬事件中大出風頭，成為激進派一支奇兵。線人指，呢個團體亦有意殺入議會，即將首次派出人馬試陣，參加下月二十七日嘅京士柏區議員補選，背後亦助「教主」毓民在九龍西布陣。
「調理農務蘭花系」核心成員陳文（花名「牛精文」）已準備出馬爭奪。呢位仁兄於幾次示威都表現勇猛，乃毓民嘅信徒，參選係首次。
呢個團體本來以新界東為據點，辦事處設喺大埔，今次殺出九龍西，可能同毓民想鞏固九西激進派樁腳有關，雖然勝算唔大，但可幫到毓民重整勢力。
呢次補選，政圈一直睇好民協林健文，上屆佢僅以兩票輸畀梁偉權，不過，建制派分別有自由黨「8A狀元」會計師符傳富，及與九龍社團聯會關係密切嘅「心賞會」會長鄧浩斌出選，後者有民建聯等在背後助陣，隨時以黑馬姿態勝出。
