電視剋星 係猛料大狀
通訊局最近大發神威，落重藥「整治」兩間免費電視台，上月裁定王征插手亞視日常運作，重罰亞視一百萬元及要「傀儡」盛品儒辭職；上周就向大婆台無綫開火，直斥佢藉市場支配優勢，以低成本囤積藝人，削弱對手競爭力，違反《廣播條例》，勒令無綫改合約並罰款九十萬元，懲罰極重手。
通訊局兩次記者會，都由主席何沛謙親自上陣。佢○八年已做廣管局主管，去年政府將廣管局和電訊管理局合併成通訊事務管理局，佢繼續做主席。
余若薇同何沛謙同屬一間大狀樓，佢話呢位仁兄係謙謙君子，作風唔「鐵腕」。
呢位鐵面判官本身係資深大律師，○三至○五年任大律師公會副主席。佢喺英國讀法律，八四年於英國及香港攞到大狀資格，二千年成為資深大狀，目前排名第四十一，與陳景生和余若薇等法律界猛人，屬同一間大狀樓，最擅長打民事案，湯家驊個寶貝仔湯煒軒都跟過佢。律政司去年在龔如心千億遺產分配案中提出新訴訟，指龔如心○二年遺囑疑點重重，要求高院決定誰是受益人，佢就係律政司代表大狀之一。
何沛謙本來好低調，太太黃韻蓓係建築師，佢自從○七年被委任為消委會副主席後，就經常曝光，踢爆奸商不良銷售手法，聲譽都唔錯。經佢手「訓斥」嘅個案，包括嬰兒奶粉廣告涉誇大誤導、私家醫院分娩套餐瘋狂加價，以及發展商偷步賣樓等，絕對幫到受害嘅小市民出頭。
今次兩台先後被轟，令外界覺得何沛謙作風鐵腕，不過余若薇就讚佢係謙謙君子，「佢超好人，好林善，絕唔係鐵腕，只不過見到睇唔過眼嘅事，一定出聲，亦會揸正來做。」
