天兔不似預期
近日彭家麗和商人朱主席合唱〈從不喜歡孤單一個〉網上瘋傳,令我隨時隨地都調校到唱K mode。趁住本周一早上送走強颱風「天兔」,眼白白留不住一天打風假期,不如哼番兩句宣洩吓啦,請以《衝上雲霄》主題曲〈歲月如歌〉音調唱出:
「掛八了,靠近了,祈求不需返工,去講心中我想,不會嫌棄,悠然歎得到成day,人人歡天喜地……,天兔不似預期,但要走,得半day,局住返工送車尾,不管有沒有say。呢個風已謝皮,係要走,如玉兔便要遠離,願佢可以,留下共我同食晏的希冀,惜世事再沒完美,可記住這強颱風整鬼你!」
被強颱風「天兔」整鬼的,還有身在溫哥華的王菀之。
在周日(九月廿二日)晚上六時四十分,天文台懸掛八號風球,同日下午王菀之在facebook上載一張從飛機窗拍攝雲層的照片,並寫道:
「一個Uncle剛從飛機拍到天兔!大家要小心啊!還要在戶外當值的人,特別感謝你們。」
心是如此善美,可惜卻被騙了,因為這張照片其實早在三年前已在網上流傳,所以既不是「天兔」風眼,也不是王菀之Uncle所拍攝,可憐的她旋即被網民洗版式取笑。
網上資訊多如星羅棋布,人云亦云,以訛傳訛,道聽塗說之後,便變成自己的親身經歷,再和朋友分享到眉飛色舞,相信你必定從身邊朋友聽過下面的「真人真事」:
剛過去的周日,網友熱傳這照片,聲稱是自己的親友所拍下的「天兔」風眼,但真相是,此乃數年前舊照,圖中亦非香港上空。
例子一:
「我有個同事嘅家姐,大咗肚幾個月,之前去完日本旅行,返嚟香港就流產咗,醫生話驗到佢肚裏面個BB中咗嚴重輻射,生存唔到。所以千祈唔好去日本呀!」
例子二:
「原來某女星被強姦件事係真o架!我朋友個爸爸係做差人,佢嗰晚咁啱喺九龍城警署報案室當值,個女星喊住咁報案,係我朋友個爸爸幫佢落口供,仲遞埋紙巾畀佢……。」
例子三:
「呢條性愛片係落選港姐XX號呀,真係睇唔出佢咁狂野,快啲睇啦,好快會刪走o架喇!」
這類傳聞如真似假,如是者年年月月,都有疑似乜乜片段或消息絕密流出,徒令乜乜受害人無辜被扯進風眼漩渦。此風如可像「天兔」般匆匆掠過遠去,只留下曾愉快過的憶記,你說多好!