中電生活可拍劇

電視劇《衝上雲霄Ⅱ》近期不時成為飯局話題，早年做國泰航空企業事務總監的莊偉茵，都說裏面講的機師空姐生涯有些似她以前接觸的同事，但未遇過像「Cool魔」咁靚仔的。

原來當年無綫拍《衝上雲霄Ⅰ》，就是莊偉茵幫手，務求電視劇內提到的一切程序細節都像真，例如飛行安全守則、空姐如何接待乘客等，所以機門未關好就話起飛等蝦碌情節一定不會發生。有時她甚至要親身落外景或廠景畀意見，所以睇見《衝Ⅱ》，就諗起從前的日子。

不過，貴為中電企業發展總裁，莊偉茵o依家一心為推廣慳電而絞盡腦汁，出名多橋的她猛話中電生活其實都可以拍電視劇，例如講吓中電裏面的女工程師點樣打拼出頭天，乘機推廣慳電訊息，再加啲感情線咁，「其實我哋同事都有好多不為人知的故事，好似早前元朗屏山變電站附近出現了好多流浪貓，同事擔心牠們會被電死，特別聯絡流浪貓組織入去，一齊捉走牠們。」

做了中電一年多，佢話中電客戶佔全港人口八成，業務入屋，比從前做國泰更貼近市民生活，挑戰好大。她笑說一般做企業推廣，應該游說人用多啲買多啲，但她就不斷叫人慳電，即係叫人唔好用咁多自己公司嘅服務，好似倒自己米。

中電在一一至一五年使用比從前多一倍的天然氣，比二十年前更用多了三倍，問題是成本增加了，市民卻最不想加電費。在電費不加和環保原則間要取平衡。中電今年力推「節能回扣」計劃，鼓勵市民用少啲，協助低用電量的住宅和工商客戶享電費回購。每張電費單用電四百度以下，客戶可享有電費回扣，莊偉茵話中電約有二百萬用戶，新措施可協助三成五約七十萬住宅客，和四成四約十三萬商業客電費維持不變或有減幅。

為更善用電能，中電曾經跟部分餐廳廚房研究由煤氣爐轉用電磁爐的可能性，莊偉茵話新一代電磁爐火力已跟傳統煤氣爐不相伯仲，不過餐廳對改裝仍有猶豫，因為工程涉及一大筆開支，需要三年才能回本，但在舖租租金高企下，不少餐廳東主都不敢規劃得太長遠。