李嘉誠請睇戲

小朋友放暑假，家長總得為他們找節目，好多都周遊列國或者上各種各樣的暑期學習班，不過低收入家庭的小朋友就無咁幸福，父母為口奔馳，邊得閒理咁多？筆者有個義工朋友，最近就搞了個請低收入家庭小朋友睇戲的活動。傾起至發現，在招待的二千多個小朋友中，好多都唔知3D電影係乜？八成更是第一次入戲院睇戲。

老友話，這個免費睇戲活動由聖雅各福群會做搞手，在剛過去的兩個星期日，安排在天水圍及深水埗等區的小朋友免費睇《怪獸大學》和《多啦A夢》，入場更有爆谷和汽水送，小朋友難得過了興奮的一日。

原來，這次活動緣起和長實主席李嘉誠有關。話說他早前在百忙之中，抽空和孫仔去了睇《怪獸大學》，被孫仔和同場小朋友的笑聲感染，原來小朋友開心係咁簡單的，即時讓李生萌生請基層兒童睇戲的念頭，於是交由李嘉誠基金會邀請聖雅各福群會幫手。

筆者不少朋友的仔女暑期活動多到不得了，游水、畫畫、跳舞樣樣都有，有的甚至去外國大學上短期語言課程。他們說暑假過後回學校上課，老師總會問暑假過得怎樣了？而這一代小朋友甚至家長之間都有比較心，說不出做過甚麼來，很難交代云云。不過這些培訓在在需財，基層家庭的小朋友，放暑假或只能無所事事過日子，難得聖雅各咁用心，令小朋友有個看電影的開心回憶。

聽聖雅各福群會高級服務經理吳雯賢講，由收到基金會構思到成事不足一星期，多數係用佢地食物銀行和助學計劃的家庭，家長長時間返工，工時長人工低，沒有多餘錢讓小朋友上學習班或娛樂，如果社區沒有免費活動，他們只能無所事事呆在家裏，見識自然不夠中產小朋友廣闊，「有小朋友問我，是否入戲院睇戲就要戴眼鏡？他們不知道原來是3D效果。」

吳雯賢說，睇完戲之後小朋友再得到快餐店的三十蚊代用券去買雪糕，好多小朋友平日都無乜機會食，皆因三十蚊已是他們一家幾口的一餐買餸錢了，況且難得一家人有娛樂，父母仔女間也多個溝通話題。

據說正因效果不錯，李嘉誠基金會決定加碼，在八月份餘下三個星期日分別再請荃灣、葵青和東九龍三個地區的基層小朋友睇戲，齊齊開心放暑假。