麻辣女教師 全家都「激」
「麻辣」女教師林慧思(上圖)在旺角狂鬧差人八婆、賤人、公安,更手指指爆英文粗口,段片上咗YouTube,隨即在網上瘋傳,引起激烈議論,正反意見紛陳,一夜之間成為網上紅人。
事後網民進行人肉起底,揭出佢係寶血會培靈學校嘅老師,任教中文及生命科學,又係社民連成員。可能件事鬧大,學校又收到唔少投訴,佢隨即於校網上道歉,話以後要戒。
佢表現咁激,同家庭背景亦好有關係。原來佢七十歲老爸林森成(下圖),曾經係卿姐個政團「前綫」核心成員,熱衷參政,做過坪石區議員,後來隨「前綫」併入民主黨,但因不滿該黨唔參加五區公投,憤而過檔社民連,同個女一齊「激」。林慧思媽咪亦對政治有興趣,現在仍然係「前綫」成員,有時都會參加泛民嘅行動。
近日激進派及一批網民湧出嚟支持呢位「麻辣」女教師,同支持差人嘅聲音大打對台,睇嚟套戲仲有下文。