「愛港」敢死隊 內訌fb互片
「愛港」敢死隊最近又出動,攞齊國旗、橫額、大聲公殺入真普聯論壇會場大肆喧鬧,潮州辣妹陳淨心(「愛港力」召集人)一馬當先,跳上枱面指罵講者,其他人就吶喊助威,講堂變咗鬥獸場。
外界以為佢哋屬同一路人馬,一定同聲同氣,實情唔係咁,當日有人見到另一團體「愛港之聲」主席高達斌同陳淨心劃清界線,表明自己嘅人馬好多都坐低,靜聽講者講嘢,擺明唔同意陳淨心做法。
此外,「愛港之聲」核心成員陳廣文,於社交網站分享一篇批評陳淨心跳上枱、叫囂爆粗嘅文章。呢位潮州辣妹見到好唔高興,在自己facebook還擊,質問陳廣文「乜嘢居心」。陳廣文自己冇回應,但上載其他評論還擊。
陳淨心見陳廣文踩到上心口,即刻反面,指「有心破壞香港的一小撮人,冇乜好討論!劃清界線冇問題,你們繼續坐定定,我們『愛港力』繼續對抗禍港政棍!」睇嚟兩幫人將愈片愈烈!