馬丁晤肥佬黎 拋方案疑團多

李柱銘忽然high咗，接受某報專訪時拋出個普選方案，提議成立千二人提名委員會，推舉五人入閘，然後由市民五揀一做特首，佢認為如果咁提名，泛民人馬就有機會入閘，阿爺想阻都阻唔到。呢個方案符合阿爺個框架，故譚耀宗反應正面，泛民就群情洶湧，有人仲話佢出賣靈魂，佢在壓力下瞬即撤回建議。究竟馬丁玩邊科？係咪冇瞓覺亂噏？引起圈內諸多揣測。

據一位熟識馬丁人士講，佢今次絕非口快快失言，原來佢個幾月前已構思呢個方案，亦跟部分泛民朋友討論過，今次同某報做訪問，事前諗好晒講乜，完全有備而戰，目的係拋出個方案影響政改討論，唔係一時即興爆肚。

呢位人士指，馬丁是頂級大狀，打慣官司擅長搵法律漏洞，見阿爺亮出底牌，即苦思如何見招拆招，最後度出上述方案借力打力，如果迫到阿爺接受，泛民人馬就有機會參選，到時勝負難料。佢可能覺得呢條係絕世好橋，想盡早拋出，於是有此驚人之舉。

馬丁咁表現，唔係一次，今次因影響到成個爭普選行動，就更加大鑊，所以出街後，民主黨四巨頭何俊仁、劉慧卿、單仲偕同李永達先後打電話畀馬丁，對佢爆出個方案表示不快，要求盡快撤回。

李柱銘拋出的方案，原來正是民主黨的底牌，該黨四巨頭即致電馬丁表示不滿。

線人指，民主黨高層反應咁強烈，因為馬丁個方案正正係佢哋嘅底牌，原本部署是先開出高價，力爭一輪，到最後階段至將底牌show出。點知馬丁一開局就揭開底牌，自亂了陣腳，一來引起泛民各派爭論，將統一平台搞散，二來令公眾覺得泛民未打就妥協，以後仲點抗爭呀！馬丁同四巨頭傾完後，亦知道自己咁做破壞團結，故同意收番。

據馬丁自己講，佢提出方案前，只同幾個學術界人士討論過，冇同傳媒老闆、樞機陳日君及陳太商量，真相係點冇人知，但馬丁撤回方案之後一日傍晚，有傳媒發現佢去咗壹傳媒老闆肥佬黎大宅，同時亦見到陳日君到場，時間上都幾巧合。

政圈中有另一睇法，認為馬丁今次是苦肉計，故意漏口風揭開泛民底牌，引發強硬派反對，警告溫和派唔好亂來，等於將張牌變「廢牌」，即係見光死。呢個「陰謀論」講到馬丁深謀遠慮，玩策略出神入化，但認識佢嘅人士認為馬丁唔似咁老謀深算，因為佢從來唔係「司徒華」式人物。