遲來的禮物 羅敏莊
去年十月三十日，羅敏莊與陳國邦的愛情結晶品──陳禛（Jan）誕生。
這對相愛十年、○九年才結束愛情長跑的愛侶，從未想過以生兒育女，來改善溫馨甜蜜的二人世界，意料之外的一份「禮物」卻選擇在羅敏莊三十七歲時降臨，本來就是驚多於喜，「呢個社會太多問題，有下一代未必係好事；就算我大住肚，老公陳國邦都係hea住摸吓我個肚皮，求求其其對住個肚講兩句。」羅敏莊說得淡然。
只是，血脈相連的女兒來到眼前後，兩夫婦的態度有了顯著的變化，羅敏莊笑瞇瞇說：「老公成日超冧咁抱住個女傾偈，而我啲母愛雖然仲未係好強烈，但做咗媽咪，令我同父母嘅關係更加密切，兩公婆嘅關係亦都昇華咗，老公仲話隔多兩年生多個，畀個女有個伴喎！」
○九年與陳國邦結婚的羅敏莊，去年意外懷孕，誕下女兒陳禛，二人世界頓變成三口子家庭，卻有始料不及的美滿和幸福。
去年十月尾，羅敏莊剖腹產女，陳國邦特地剃了鬍鬚，以最靚仔一面，跟女兒拍攝第一張照片。
判若兩人
「有BB係意外嚟嘅，雖然啲朋友成日同我講生育係人生必經嘅階段，兩公婆加埋小朋友先至夠完美，但係我同老公（陳國邦）其實都冇諗住生。」羅敏莊坦言。
無心插柳柳成蔭，羅敏莊與陳國邦帶着輕鬆心情迎接新成員，輕鬆得把一般孕婦的忌諱，例如：搬屋、喝凍飲、吃海鮮等都不當是一回事，更遑論有任何胎教，羅敏莊憶述：「啲人話要同BB傾多啲偈嘛，我本身咁鍾意講嘢，我諗BB喺肚裏面都聽到我同人哋傾偈喇。有時叫老公過嚟同BB傾兩句，佢就好hea咁話『邊聽到o架？』BB踢我，叫老公嚟摸吓我個肚感受吓，佢又求求其其摸兩吓走咗去。」
○九年十二月，羅敏莊與陳國邦結束七年愛情長跑，於沙田凱悅酒店舉行一連兩晚的婚宴。
不過，兩人的結晶品陳禛出生後，兩公婆卻有明顯的轉變。先說剖腹當天，向來鬚根滿臉的陳國邦，忽然皮光肉滑地來到產房，他說，希望跟女兒拍攝的第一張照片可以靚靚仔仔。跟着第二天，陳國邦一早便來到醫院探望母女，抱着女兒超冧地說：「嘩，BB好靚呀，你係爸爸個女嚟o架喎！」其後，陳國邦更肩負起湊女的主要職務，主動跟外母學習如何跟嬰兒洗澡，又終日攬着女兒同眠，父愛盡現，羅敏莊笑說：「佢其實好鍾意小朋友，而且比我更有耐性，依家個女得兩個幾月，佢已經成日同佢講道理，睇嚟將來教女嘅重任都係交畀老公囉。」
至於直言未習慣成為人母的羅敏莊，卻感覺到跟陳國邦的感情再度昇華，看到丈夫對自己及女兒的無微不至，幸福滿瀉，「我老公不嬲都係一個好sweet嘅人，拍咗拖咁多年，每次食飯、瞓覺都會錫錫；到我有咗BB之後，佢又會每晚同我揑腳、搽潤膚露，佢嘅細心令我哋嘅關係更加成熟。」
