財爺出「雙辣」勒住樓市後，一、二手住宅交投即時冰封，「聰明錢」馬上轉炒商舖搵食。有地產界人士講，兩年前推出嘅SSD，已經趕咗部分熱錢去炒舖，令舖租「三級跳」，怕且今次都唔例外。做老闆嘅賺埋分分鐘唔夠交租，生意更加難做。

一言早前提過，今個月上市嘅富豪茶餐廳翠華，有意接手「阿一鮑魚」位於駱克道嘅舖位。阿一因為不敵業主由七十萬瘋狂加租至百二萬，惟有忍痛「搬竇」。

翠華想接手，據聞係老闆李遠康鍾情該舖樓高四層，有成六千呎，加上靠近銅鑼灣地鐵站，人流夠旺，佢老哥秘製嘅咖喱毛利又高過大家樂（0341），唔介意畀多少少，所以願意出價一百萬承租。

李遠康手上有唔少商舖，最值錢係中環章記大廈嘅地舖。

點知單「刁」一直只聞樓梯響，一言最近收到風，個舖嘅業主計過數，嫌翠華出手「差咗啲」，反價一百七十萬，即時嚇窒李老闆。其實錢邊有得賺盡，財爺已經放晒風話唔排除推出舖位SSD，若然「辣招」成事，嗰位業主大佬真係喊都無謂。

講開李遠康，佢都揸住唔少舖，市值近四億，最值錢係中環德輔道中與租庇利街交界「章記大廈」地下連地庫嘅兩層大舖。有資深舖位經紀爆料，唔少炒家吼到實，想出高價買，李老闆都話無得傾。無他，佢老哥做「外賣仔」出身，對飲食業有感情，個舖留番嚟自用好過。至於會唔會放入上市後嘅翠華益股民，散戶就要「目及」實本招股書了。

賣「阿一鮑魚」嘅富臨，都頂佢唔順「天價」舖租。

李遠康持有舖位