低俗能醫百病
一般而言,「低俗」係一個貶義詞,但係同類題材放喺彭浩翔手上,即時變種成為文化。即將喺8月9號上映嘅《低俗喜劇》,彭浩翔用電影講電影人嘅辛酸史,加埋誇張手法去講拍電影嘅潛規則,配合佢嘅好拍檔杜汶澤嘅瞓身演出,仲令電影未上映已獲如潮好評。
我知道彭浩翔嗜食牛,於是特別挑選咗位於尖沙咀嘅「燒肉牛蔵Yakiniku Gyukura」,同導演、阿澤,仲有《低俗》女主角DaDa(陳靜),暢談以「低俗」製造歡樂嘅過程。
我同DaDa、阿澤及彭浩翔,今晚以「低俗」為中心。
宣揚獨門文化
多年前嘅《買兇拍人》同《AV》,都顯示出彭浩翔作品嘅本土氣息,佢已經好耐冇真正拍一套純廣東話嘅港產片,今次《低俗喜劇》可以話係佢「重操故業」嘅作品,佢一向擅以港式粗口凸顯港片嘅精髓,所以今次嘅《低俗》係繼《志明與春嬌》後,再一次因為電影中含大量粗口而被評為三級片嘅電影。
阿澤同DaDa齊齊七情上面。
彭浩翔一直係香港文化嘅代表。
「好多人都覺得,講粗口係好粗魯、好低俗,但係其實只有粗口先可以反映到我哋香港人嘅文化,仲有唔同時代背景嘅意思。好似我同音音姐(邵音音)拍一場戲,內容係講佢覺得部戲好垃圾,想推阿澤嘅。對戲嗰陣我叫音音姐同阿澤講:『你咪X叫我拍埋啲咁嘅戲啦!』
「但音音姐話佢哋唔係咁講啲粗口嘅,仲話:『你roll機嗰時我先講啦!』我一roll機,佢就將句對白改成:『你唔好叫我拍埋啲X屎戲啦!』
「到嗰時我先知,原來音音姐嘅年代係興咁樣講粗口,真係學多樣嘢。」
哈哈哈!而音音姐嘅對手阿澤,就即場爆笑,「嘩!我一聽到音音姐咁講,真係忍唔到笑,即係我呢一代嘅人係唔會咁爆粗,不過咁樣反而仲突出唔同人嘅背景。」
佐賀和牛他他($98)打頭陣,係開胃之選。
北海道海膽刺身($380)以鮮味取勝。
平貝($260)入口爽甜。
戰友合作無間
阿澤同彭浩翔合作無間,二人識於未紅時,阿澤話一切都係緣份。「嗰時我仲喺亞視,佢已經話將來開到戲一定搵我做男主角。哈!講真,我又唔係靚仔,嗰時又唔紅,咁我咪同佢講:『等我同你都紅啲先講啦!』
「到機會真係嚟嘞,彭浩翔就揾我,拍嗰套就係《大丈夫》。之後我哋就繼續合作,今次仲只係用咗12日就拍完《低俗》,都真係唔簡單。」
飯敍期間,我同一眾嘉賓都high晒,你睇相就一清二楚!
阿澤興奮講述同音音姐合作嘅趣事。
彭浩翔接住話:「同阿澤夾慣,加上今次可以拍屬於香港人嘅嘢,所以我會有特別嘅嘢放喺戲入面。我好懷念以前睇港產喜劇嘅日子,以前喺金聲戲院睇戲,啲觀眾會笑到踢到前面座位嘅背脊,但係同類情況已經冇咗好耐,我好想再做到呢種情景。特別係今年,香港實在有太多唔開心嘅嘢,我好想畀觀眾入戲院relax吓,癲啲笑餐飽。」
特上刺身($298)包括帶子、油甘魚等新鮮刺身。
日本毛蟹($298)每日由日本直送。
即場教「筷正宗」
哈哈哈!至於起用DaDa,就係佢哋嘅集體決定,阿澤話:「有場戲講DaDa用筷子夾餸畀我,點知佢連揸筷子都唔識,點呀?依家識未呀?」
DaDa即刻執起雙筷,向阿澤展示佢學識正宗揸筷子手勢,然後不忘多謝彭、杜二人。「今次同導演、阿澤、音音姐合作,學識咗好多嘢,唔止係揸筷子咁少。」
哈哈哈!彭浩翔同阿澤都話DaDa演出夠自然,而且電影喺優先場已經贏盡口碑,未上映先轟動,要乾杯慶祝啦!乾!