白姐姐收午夜凶鈴 提名人受壓

白姐姐出戰超級議席，本來一個無黨無派嘅「小女子」（佢自己謙稱）出嚟鬥大黨巨頭，何足道哉，但估唔到會咁受重視，可以話係異數！

唔講唔知，原來白姐姐報名前夕，突然有一批提名佢嘅區議員變卦，收番個簽名，搞到佢差啲入唔到閘。事緣白姐姐過去數周四出搵人提名，最後湊足二十一個（最低門檻係十五個），但有人擔心佢搶走民建聯李慧琼嘅票，影響呢位新貴嘅選情，於是喺背後發功，向提名白姐姐嘅部分區議員「曉以大義」，要求佢哋撤回簽名，阻呢匹黑馬入閘。結果白姐姐喺交表格前一晚，連續收到「午夜凶鈴」，話唔支持佢啦，白姐姐講到口水乾都冇用，個手機傾到冇晒電，乾脆熄機乜電話都唔再聽。

白姐姐出戰超級議席，本獲二十一個區議員提名，但報名前收到「午夜凶鈴」，四人撤回簽名，原因係後面有人唔想佢搶李慧琼嘅票。

一輪「午夜凶鈴」之後，白姐姐冇咗四個提名，剩低十七個。為免再少幾個，令參選夢碎，佢天濛光就趕去等開門報名，為免提名人喺門口截佢「抽飛」，佢由後門「鼠」上樓，終於成功報到名。

其實撐佢嘅區議員，亦唔係個個受壓轉軚，其中廣播界前輩羅榮焜（當年嘅電台主持羅山，同白姐姐拍過檔），就講義氣支持到底，唔理有力人士嘅游說。

白姐姐部分提名係cold call取得，部分則係阿Paul喺新界嘅區議員朋友（佢係原居民，同新界好有淵源），背後冇乜大勢力，佢個助選團隊仲未成形，廣告位又畀人book晒，只借咗架開篷cooper仔，準備行晒各區做宣傳，所以話佢威脅李慧琼，有啲杞人憂天。

白姐姐私下同好友講，佢真正威脅嘅係泛民，因為佢唔怕講平反六四，亦理直氣壯主張普選，同泛民冇乜分別，反對嘅只係政治爛仔文化，專打毓民之流，故會攞到一批唔順眼嘅中產票。

梁朝伊始，就頭頭碰着黑，政府總部「褲穿窿」風水格局，又再受到議論，有專家提出轉運之策，值得新班子諗諗。

風水師周漢明同小弟講，過往政府總部起喺山邊，靠住個山，而建築物都穩穩陣陣，雖然薯啲，勝在夠實在，但新總部中間空晒，外形好好睇，但虛浮不實，呢個格局，令政府講就動聽，實行起嚟就阻滯多多；而且遠離山邊，中間有告士打道等幾條大馬路貫穿而過，來龍被截斷，令靠山冇晒力，施政必然比以前更難。佢建議喺「門常開」之外起個雕塑，擋住呢個大窿，情況可能好啲。

精通風水嘅建築師蔣匡文睇法亦相近，佢舊年已撰文講過，新總部之建築建設風水甚差，政府遷入後，必定是非爭鬥多，政府施政冇力，民眾離心，估唔到畀佢不幸言中。但蔣老兄認為此格局雖不利政府，卻有利女高官，權勢會更大。依佢所講，莫非林鄭有機會成為亂世王者，再上一層樓？

講到解救方法，蔣老兄同樣建議在「褲穿窿」位置起一座「陽形」塑像，或派部分高官去政府舊總部辦公，可能有啲作用。

至於禮賓府，董伯伯九七就任特首之時，冇搬入呢幢前港督府，有風水師指此地乃權威所聚，董伯伯唔入住坐鎮，不利政府權勢，照咁講，振英哥應該盡快擇日由山頂大宅移往禮賓府，並搵人擺個擋煞風水陣。

振英哥登位大半月，為顯新人事新作風，唔覺唔覺已改咗啲舊規矩，例如收禮。官場老友講，新班子已達成共識，高官以嘉賓身份出席任何團體或社會活動，一概唔收紀念品，貴至金牌，平至一百幾十嘅玻璃膠擺設，都免啦。呢個做法值得一讚，好多社團送畀高官嘅紀念品，大部分無聊兼無謂，全冇保存價值，轉吓手就成垃圾，浪費地球資源，現在講明唔使搞呢科，大家都開心！

除咗免除致送程序，特首同司局長亦同團體講，上台唔戴襟花，費事嘥物料，藉此倡導簡約風氣。有人講笑，過往高官主禮胸前都有束大紅花，以後台上冇襟花嗰個至係主禮嘉賓。

聽講新班子亦已定出收禮原則，所有外界送嚟嘅禮物全部婉拒唔收，即使對方客氣堅持，都唔破例，一來避免閒言閒語瓜田李下，二來無謂令政府為存放太多禮物而煩惱。