林鄭踩過界 管埋鬍鬚嗰瓣
林鄭做發展局局長之時，一直睇土地嗰瓣，到振英哥上台，佢升做政務司司長（CS），呢瓣就歸財爺鬍鬚曾掌管。但官場心水清人士最近發現，林鄭成立咗四個政策小組，由佢親自主持，其中一個係「土地房屋及運輸基建小組」，睇埋土地政策，明顯係踩過界。
振英哥當日搵林鄭做CS，阿爺就安排鬍鬚曾繼續坐財爺個位，睇住金融財經，保證唔出亂子，其後更將土地政策畀埋佢揸，林鄭唔可以直接掌管。可能林鄭知道土地政策事關重大，唔想放手，所以搞咗呢個政策小組，由佢揸弗，等於管埋土地政策，究竟將來佢同財爺邊個有決策權？實在幾模糊，咁搞落去，遲早有矛盾。
最近鬍鬚曾公開評論主權基金，同振英哥唔多夾口形，已有人話佢有自己一套，唔多聽新老細支笛，日後鐵三角點合作，大家要放長雙眼睇啦！
