建立自信 從拉丁開始
舞蹈,能陶冶性情,鍛煉身體的協調性,使身心舒暢。
為了讓更多小朋友享受跳舞帶來的愉悅,擁有英國皇家舞蹈協會院士及評審資格的蘇嘉怡(Erica),上月於銅鑼灣開設舞蹈中心「U CAN DANCE」,更請來多位猛人幫手,包括亞洲國際標準舞蹈大師周志坤,還有廖碧兒(Bernice),連同十四位導師,教導芭蕾舞、Hip Hop、社交舞、拉丁舞及印度舞。而在多種舞蹈當中,Erica則推薦小朋友先學習拉丁舞:「拉丁舞除咗可以訓練小朋友嘅節奏感同肢體靈活性外,仲可以培養出開朗嘅性格,增強自信,小朋友學咗拉丁舞先,對學習其他舞蹈或者音樂,都有幫助。」
於上月開幕的「U CAN DANCE」舞蹈中心,有亞洲國際標準舞蹈大師周志坤擔任校監及舞蹈創作總監,難怪不少小朋友慕名而至。
Erica認為,小朋友從小接觸舞蹈,更容易成為一個專業的舞蹈者,因為,她們的肢體較柔軟,學習能力及吸收新事物的能力也特別高,她說:「小朋友係一張白紙,發展空間比較大。一般嚟講,我哋都會推薦小朋友學跳拉丁舞同埋芭蕾舞先,因為跳拉丁舞可以令手腳更靈活,透過同其他小朋友一齊學習,提高社交技巧,最重要係拉丁舞可以令佢哋更加開朗,自信都明顯增多咗。」
相比起芭蕾舞,拉丁舞無論在舞步上及節奏上都較快,較容易建立小朋友的活潑個性,而且有助她們保持均勻的線條,Erica說:「我好細個就學芭蕾舞同中國舞,但係學咗拉丁舞之後,真係改變咗整個人嘅身形,練出一個『S』身形,冇咁容易變肥,如果女孩子可以喺發育時期學拉丁舞,絕對有助美化個人線條o架。其實畀小朋友學跳舞,最緊要係令佢哋識得享受音樂,去分辨節奏,從中有所得着,而唔係一定要佢哋跳出嚟好靚,先叫完美!」
於上月開設「U CAN DANCE」舞蹈中心,老闆Erica於短時間內越級考取了英國皇家舞蹈協會院士及評審資格,並身兼中心的拉丁舞導師,她聯同十四位擁有專業資格的舞蹈老師,按照小朋友的年齡、資質來分班,並以英語授課。值得一提的是,該中心請來亞洲國際標準舞蹈大師周志坤,擔任校監及舞蹈創作總監,不斷為學生創作新舞步,同時發掘小朋友的長處所在,再作重點培訓,另外還有廖碧兒(Bernice)出任客席芭蕾舞導師。Erica說:「Bernice每隔個半月就抽時間嚟呢度教芭蕾舞,佢好熱愛芭蕾舞,亦好熱愛做一個導師,所以依家啲學生都好期待Bernice出現,唔係被父母強迫入嚟嘅!」