《歲月》大耳牛 強攻英數入男拔
電影《歲月神偷》挾柏林影展最佳影片「水晶熊獎」，及成功保留永利街之名，大收2,000萬。羅啟銳及張婉婷的老香港情懷熱爆以外，戲中飾演「大耳牛」的鍾紹圖，8歲人仔細細已殺入金像獎「最佳新演員」入圍名單，一炮而紅！
現實中的紹圖仔沒有笠着金魚缸扮太空人，家住錦田的他喜愛跟同學仔通山玩，而在父母栽培下，紹圖仔對英文、數學培養出興趣來，加上3歲已背乘數表令他的記憶力特強，無論在家或在學校都集萬千寵愛在一身，難怪有傳他將於9月入讀名校男拔萃小學。
6歲前的紹圖仔是家中獨子，「星媽」Winnie把全副精神投放在囝囝身上，他1歲時就教他中英文，3歲就教他背乘數表。
因為《歲月神偷》的「大耳牛」一角，令紹圖仔在就讀的學校被同學暱稱為「大明星」。
紹圖仔有兩個妹妹，分別是3歲的綽倫（左）及1歲的綽華（中），圖中紹圖仔剛被綽倫於夜半揮剪，把額前的劉海剪短，「妹妹剪完我哋都唔知。」
獨門字母記憶法
紹圖仔比《歲月》中的「大耳牛」更加活躍，訪問中常拉着攝影師在公園裏跑跑跳跳，並說：「我成日嚟呢度玩㗎，（最鍾意玩咩呀？）『sir』滑梯囉！」其實公園內只有一個文天祥像，紹圖仔所指的「滑梯」，是公園內的山坡，其好動程度，可想而知。
28歲的「星媽」Winnie在旁補充：「佢平時放學一揼低書包就同3個同學仔嚟呢度玩，玩個零鐘先返屋企做功課，成績都算唔錯（全級160多人考第22名）啦！」
紹圖仔即場示範倒轉背出26個英文字母「zyxwvuts……」，背畢後還跟記者說：「我教你吖！好易㗎咋，要用小楷記㗎喎，將啲英文字母分咗做3組先：z到q、p到j同埋i到a，q好似唔同p玩咁，j就包住咗k，但係又唔睬i咁喎，分開3組咁背，我用半個鐘就記住咗嘞！」
在錦田惇裕學校就讀三年級的紹圖仔，因少吃水果而在課室門外的水果報表「落後」（小圖），他調皮的說：「佢哋係又貼唔係又貼之嘛！」
這個聯想方法，是紹圖仔自小被Winnie訓練出來的，由於鍾爸爸Brian從商，管教紹圖仔便由Winnie全力負責，她說：「我覺得喺香港讀書一定要英文底子好，所以喺鍾紹圖細個嘅時候，我就特別自製一啲中英雙語嘅認字教材，日日同佢認字、串字，培養佢對英文嘅興趣。
「到佢大個啲，喺學校有參加一啲閱讀獎勵計劃，睇一啲畀小朋友睇嘅英文故事書，好似講小蜜蜂故事嘅《Buzzy Bee》系列咁，佢好鍾意，仲話蜜蜂仔同佢個英文名（Buzz）差唔多添！」
喜愛英文的紹圖仔，曾成為校內英文閱讀的冠軍。
去年紹圖仔參加校際朗誦節英文獨誦比賽，並獲得優異獎。
3歲識背乘數表
除英文外，紹圖仔亦有力攻數學，Winnie會着兒子每天做約1小時的數學習作，「數學係熟能生巧，其實做得多就會熟，所以做補充練習就最好。其實鍾紹圖一、兩歲嘅時候，我冇工作專心照顧佢，已經教識佢基本嘅加減數，到佢3歲開始，我要佢背埋乘數表，咁對佢記憶力嘅發展好有幫助，所以佢依家記性好好，無論課本或者對白，佢睇一兩次就記得。」
媽媽一話畢，紹圖仔就繼續說：「我英文名叫Buzz係因為我好鍾意巴斯光年，我鍾意佢係太空人，又識飛，可以飛上太空……讀書呢，我幾鍾意英文，不過都係鍾意體育科多啲，可以打排球，你知唔知呀，打排球隻手要咁（即席示範）㗎，我大個啲要打比賽！」
對於有傳紹圖仔因《歲月》之名，有機會入讀名校男拔萃小學，Winnie稱：「有機會都要佢嘅成績OK先至得嘅，依家要努力啲嘞鍾紹圖！」
紹圖對文武皆有興趣，在父母的培育下作雙線發展，據兒科醫生馮而亮稱：「6至9歲嘅小朋友，每星期作適當嘅運動，大約5至8小時，對身體同腦部嘅發展都有幫助！」紹圖仔成日周山跑咁活躍，難怪記性都好啲！
紹圖仔跳跳紮，經常扮鬼扮馬，連跟「星媽」Winnie合照，他也冇時停。
紹圖仔與父母、兩個妹妹、爺爺嫲嫲及兩位叔叔同住。
自小表演慾特強
對於演出《歲月神偷》，Winnie稱是鍾爸爸的無心插柳，「爸爸喺網上見到有小演員招募，鍾紹圖平時又鍾意跳上茶几跳扭腰舞，有咁強嘅表演慾，就問佢玩唔玩，佢想玩吓咁，我就帶佢試鏡。
「喺第2次試鏡嘅時候，導演（羅啟銳）叫咗cut，鍾紹圖仲繼續喊，於是導演問佢叫咩名，佢答自己係『大耳牛』，之後就係做咗『大耳牛』呢個角色嘞！」
