「處長賽」爆冷 戴健文意外勝出

廣播處長呢個三煞位邊個出任，經過幾番轉折，終於有眉目，如無意外，將由現任助理處長戴健文坐上。聽講佢上周已獲高層最後一次面見，亦過晒品格檢查，睇嚟好快公布。

戴老兄今次可謂守得雲開，亦應驗電影《打擂台》內老師傅一句對白：「唔打就唔會輸，打就一定要贏」。四年前朱培慶「出事」辭去處長一職，政府搵人接替，當時戴老兄企出嚟問鼎，最後輸畀「老行尊」黃華騏。到黃翁心血管塞咗要退役，處長位懸空，佢又再上擂台爭逐，但仍被視為冷馬，因為政府傾向由資深傳媒人「空降」克制港台內激進勢力，港台人戴健文只屬次選。

競賽轉入直路出現意外情況，戴健文成為唯一人選，終於守得雲開。

政府搵獵頭公司四出狩獵，曾經斟過前政務司長新聞秘書關太（Heidi），但佢間公關公司做得好好，唔想再入熱廚房；獵頭公司又搵到一位傳媒界大哥級人物，佢做過電視同報紙主管，擅長接燙手山芋，軟硬手腕兼備，乃整治港台理想人選，故入到final round，被圈內視為大熱。

但到最近，競賽出現意外情況，呢位大哥轉入直路後冇再跑，戴老兄成為唯一人選。呢個賽果，政府唔多願見，因為戴老兄在港台工作近三十年，做嘢圓滑兩邊兼顧，將來對待港台激進勢力唔會好勇，隨時被班友「挾持」同政府玩。但事到如今，政府已冇乜選擇，惟有寄望佢老哥揸硬啲。