特首辦搬新屋 研究過風水
特首辦本周一喬遷之喜,由禮賓府搬去添馬艦政府總部辦公,有八卦友問知情人士,煲呔個office有冇睇過風水?入伙會唔會拜吓神?佢話,成座政府總部最初設計嘅時候,已考慮晒風水因素,煲呔office嘅坐向當然亦研究過,特首同香港運程息息相關,風水唔可以唔諗。至於拜神,煲呔同特首辦高層都信基督,而且官員向來唔興呢味嘢,所以唔會搞。
佢又話,今次特首辦搬屋,一眾同事都覺得環境好咗,原來過往在禮賓府辦公,外面睇好似好威咁,其實裏面辦公室好窄,部分房間連窗都無,不見天日,會議室亦甚細小,工作諸多不便,新政府總部就光猛寬敞好多。
最開心係「搵食」十分方便,附近有多間食肆可揀,之前在禮賓府,最近係明愛中心個飯堂,落中環就行到身水身汗,如今終於有啖好食。