大生馬家 變半個「釘王」
講起舊樓收購，過去啲收樓佬最怕就係遇到物業畀人落釘（意思係有心人特意買入一兩個舊樓單位，等人收購時坐地起價），其次就係啲老牌家族，佢哋揸住唔少物業，又唔等錢用，正所謂你急佢唔急，搞到收購隨時胎死腹中。
聽老友釘王講，大生地產（0059）馬氏家族喺港九持有唔少舊樓，好多仲係啲散單位或者係舖，大部分用作收租；而馬家又好有錢，除非你出到好高價，否則都唔多願賣，結果馬家啲物業經常係收樓佬收到最後嘅單位，變相成為釘，難怪有人話馬家已經係行內半個釘王。
近排有兩宗強拍個案，涉及嘅單位都係馬家物業，兩個單位分別位於銅鑼灣加路連山道一○五號，以及薄扶林道五十三至五十五號富華樓。其中加路連山個地下單位，收購方出到千六萬，後尾加碼到兩千萬，大生都不為所動，你話跟呢啲家族講收購，真係唔容易。
