I Banker蒲「老蘭」要小心
唔少喺投資銀行工作嘅人,一係老外,再唔係就浸過鹹水,即使唔係呢兩類人,因工作關係都經常接觸外國人,一般都比較洋化,鍾意蒲酒吧;而I Banker喺中環工作,特別鍾意放工後蒲蘭桂坊,貪其方便兼夾有氣氛。
大家都知,除咗飲酒之外,唔少人醉翁之意不在酒,說穿了都係為咗識女仔,話晒都係金融財俊,年薪吓吓一千幾百萬,加埋滿口英語,媾港女中嘅機率都唔細。不過,近排跟啲投資銀行家老友講起,佢哋話依家班行家收斂咗好多,唔敢立亂咁跟啲女性有下文。
好多I Banker去蘭桂坊都係想結識異性,靚女自然成為佢哋獵物。
點解?原來早前某家美資大行分析員,喺老蘭識咗位單身女性,大家飲多兩杯後,分析員送女士返歸,跟住就上埋女士家,之後發生乜事,怕且唔使一言講大家都心裏有數。點知事後分析員畀人告強姦,事件究竟係點,真係佢兩個先知;不過,後尾聽講撤銷控訴,但呢件事畀唔少人知道咗,搞到分析員好麻煩。
搞到咁大鑊,梗會畀公司同事背後指指點點,你話幾冇癮;況且公司知你曾涉及呢啲事,對你印象都大打折扣,想升都唔容易。難怪近期啲Banker話,情願花啲錢,都唔敢去老蘭搵一夜情。