主頁 > 娛樂放題 > 留星語 > 何雁詩有子萬事足│生B久休兩年擔任HOY TV亞運主持分享Working Mom必勝筆記 2023 年 07 月 18 日

何雁詩有子萬事足│生B久休兩年擔任HOY TV亞運主持分享Working Mom必勝筆記

要贏，並非努力，或者好勝便可，還是要取決於心態。
入行十四年的何雁詩，藝人以外，還曾是香港高爾夫球代表選手，心態算是贏了吧？
「以前嘅我，認為成功就係攞『最受歡迎女歌手』、『最受歡迎電視女角色』，但其實呢種爭係好Toxic（有毒）嘅，要用攞唔攞到獎、企唔企到喺中間，但呢啲嘢又唔可以自己完全控制到，所以用嚟界定自己開唔開心，係好虛無嘅。」
兩年前，婚後的她，離開樹大好遮蔭的TVB，成為獨立音樂人，去年還多了一份正職：誕下兒子鄭讚廷（Asher），此後她對獎座、獎金及獎品，也有了一百八十度轉變。
「我嘅慾望冇咁強，只要我做好我o依家鍾意做嘅嘢就OK，我想個仔睇到，可以to be proud of your mom（為媽媽感到自豪），嗰個Proud唔係因為要爭崩頭爭啲咩，而係見到媽咪都好努力，去追尋自己嘅夢想，我希望可以Inspire（啟發）到佢。」
三十歲的何雁詩，享受當Working mom的生活，一邊是有子萬事足，另一邊則是繼續追夢，贏晒！

三十歲的何雁詩，享受當Working mom的生活，一邊是有子萬事足，另一邊則是繼續追夢，贏晒！

Good Vibes

要兼顧工作和家庭，不一定令兩職媽媽身心俱疲，何雁詩表示：「如果我成副心機擺晒落佢（兒子）度，我估我嘅心情，未必可以喺最好嘅狀態，去處理屋企嘅嘢，要留番啲時間俾自己，o依家咁樣係最開心嘅。」
說的是她為生B久休兩年，最近既擔任HOY TV的亞運主持，又推出新單曲〈The Right Kind〉，全面復工。
「新歌係我大住肚寫嘅，差唔多生得嘅時候，當時疫情最勁，六點後冇堂食嗰排，我大住肚就更加驚，所以就留喺屋企，上咗一個網上嘅音樂課程，學作曲、Management，跟住就寫咗呢首歌。
「我以前喺大公司，又做過獨立音樂人，到o依家簽咗新公司，我發覺自己周圍最需要嘅人，係我嘅Right kind of人（對的人），我唔使做最Top，唔使爭乜嘢獎，o依家就係最好嘅。」
創作靈感澎湃，她歸功於荷爾蒙，「喺我大肚嘅時候，荷爾蒙係特別幫到手嘅，你知大肚婆係特別多感覺，好彩嗰陣我寫歌，將好多情緒釋放咗出嚟，而唔係做一啲有災難性嘅事，例如發脾氣。」

為兒子稍作小休後，何雁詩剛推出自己有份監製的新曲〈The Right Kind〉，兼任作曲人的她，於陀B時已寫好作品。

Happy Boy

親身經歷了荷爾蒙的威力，何雁詩的創作靈感如泉湧外，也一度被影響。
「因為生完BB，啲荷爾蒙仲喺度『焚』緊吖嘛，成日都好掛住佢，我記得生完冇耐，我只係出去Staycation一晚，夜晚都係掛住個仔掛到喊，跟住全晚就喺度睇個Baby cam睇佢瞓覺，到Asher六個月後先好啲，有番多啲自己嘅時間。」
跟老公鄭俊弘也是新手父母，她笑言幸好有陪月幫手，「因為初時Asher唔係好食奶，一唔食又成身硬晒、蹬直晒，而我同老公第一次做父母，唔識點處理，好在陪月教我哋，搵咗一個Magic，俾咗個奶嘴佢，就令佢變咗第二個人咁，哈哈！」
疫情期間，Asher跟鄭俊弘也兩度染疫，令何雁詩甚為擔心，「第二次嘅時候，爸爸就OK嘅，但Asher都有發燒同嘔，我要兩個鐘頭同佢沖一次涼降溫，但係佢係Happy boy嚟，病到咁辛苦，都會對住我哋笑。」
訪問這天，何雁詩表示兒子正跟爸爸上Playgroup，「佢九個月嘅時候，我哋就俾佢上Playgroup，唔係想佢攞證書、入名校，只係想佢出去多啲，有多啲Stimulation。我同老公都想佢Layback（悠閒）啲，而且一Chur佢，佢辛苦，我自己都辛苦，我想佢EQ叻啲，而唔係IQ，因為EQ叻，可以有好多選擇。」

為人母的手機Wallpaper，大部份也是兒女的萌照，何雁詩也不例外。

左上臂位置的「A」，是兒子Asher的專屬紋身。

左上臂內側的「Que Sera Sera」，是Doris Day名曲，是法文跟西班牙文的「Whatever will be, will be」的意思，是她的心境，也是她童年時，何媽媽常對她唱的歌。

認低威

何雁詩的三人世界，幸福指數大可參考她跟老公鄭俊弘的IG，但羅馬並非一日建成，這對新手父母，於兒子出生之初，也有手忙腳亂的日子。
「由拍拖到做父母，我同我老公都係比較少磨擦嘅，對上一次就係啱啱生完Asher嘅時候，因為我哋都未係好拿捏到作為父母嘅平衡點。以前嘅生活都係圍繞兩個人，突然之間多咗一個人，點樣去Balance？我哋要經過冷戰、傾偈，就決定各自撥番啲時間俾我哋自己，放手俾屋企人照顧個仔。
「我都好感恩，當我生完個仔，啲荷爾蒙最勁嘅時候，有咩事我老公都係選擇『呼——』呼氣，唔同我拗，等我講晒先再慢慢傾。」
外表甚具霸氣的她笑言，二人有拗撬時，反而是她先認低威，「通常都係，估唔到呢？好早之前已經係咁，就算我幾唔想，都會講咗Sorry先，咁大家就會下咗啖氣。」
令何雁詩甘於當「下把」，是老公的細心，「我大肚嘅時候，六月生BB，五月母親節佢就買咗紮花俾我，收到嘅時候我係（作哭泣狀），爆晒啲情緒出嚟，當時佢唔係攬住我，而係默默坐喺我側邊照顧我。」
添丁通常一不離二，她坦言：「我好想生多個o架！老公喺我生咗Asher之後一個月，就同我講想即刻生多個，我都估唔到佢咁鍾意小朋友，可能生咗第一個，令佢啲父愛爆晒出嚟！不過唔係o依家，Plan吓先。」

何雁詩於上周撇下老公，與父母及兒子暢遊東京，抱着外孫的何爸爸（左圖），即使戴着口罩也看到其愛孫情切。

左臂密碼

Twitter大戰Threads的年代，紋身並非龍虎鳳大雜燴，而是藝術及寓意的象徵。
何雁詩的左臂，也有數個紋身，背後也有獨特的意思。
如近左腕上的毛莨，就是代表其愛犬Buttercup，紋上這個紋身的同一天，她也紋了一個「A」字，「係為Asher紋嘅。我哋改佢個名嘅時候，講咗好耐都講唔掂數，個List又好長，揼晒啲名出嚟都唔啱，最尾我同老公都覺得呢個名OK。
「呢個名係代表Happiness in Hebrew（希伯來文），我哋兩個都覺得，最想Asher有嘅，就係快樂。佢仲有個Middle name，叫Douglas，係致敬番Fred嘅公公，因為喺佢心目中，公公就係佢嘅Father figure。」
鏡頭移至何雁詩的左上臂內側，是富美感的「Que Sera Sera」，「我細個嘅時候，媽咪成日對我唱呢首歌，而我都好鍾意歌嘅意思，Whatever will be, will be，順其自然。」
或許，社交平台是千變萬化的溝通橋樑，但要表達心意，還是實體才最實際，何雁詩的心意，大概已無聲勝有聲地傳達了。