今年母親節，對三十六歲的前落選港姐李美慧（Vivi）來說，別具意義。
一八年，她與大自己廿五年的富豪曾文豪閃婚，同年誕下現已四歲的寶貝女曾昭淳；下月初，輪到肚內兒子出世，湊成一個「好」字。
短短幾年，由人妻變人母，她坦言母親這份工很難打，但依然堅持親力親為湊女，不倚賴工人。「有時我都教到好火o架！唯有喺房貼紙仔『溫柔』、『我係一個賢妻良母』、『忍』來提醒自己。」
她自言在家中扮演惡人角色，但奇怪的是，女兒依然好黐身。血脈相連，大抵昭淳知道媽咪用心良苦，自己是媽咪的心肝寶貝吧。

兩母女都喜歡動物，她期望女兒將來做動物醫生，義務救助弱小生命。

李美慧肥胎不肥人，陀B七個月時，只肥了廿二磅，預產期則在下月初。

四歲女兒曾昭淳，每日都會錫錫媽咪的肚皮，期待早日與弟弟見面。

 儲印仔換禮物

臨盆在即的李美慧，步履輕盈，訪問期間，提到教女方法時，不時哈哈大笑，絕對是一個開心孕婦。她表示，從不會跟女兒昭淳講BB話，反而會講道理。
「好似佢欺負其他小朋友，唔同人玩，我咪教佢要感同身受，如果有人咁對你，你會唔會開心？爸爸（老公曾文豪）成日話我囉嗦，我話唔係喎，小朋友要喺六歲前，不斷喺佢身邊講道理，等佢潛移默化入咗腦，將來大個先會記得。」
很多家長會用naughty corner讓小朋友反思己過，李美慧笑說：「我會郁手，哈哈！當然唔係虐待嗰種，係打pat pat，等佢知道我一次又一次警告，你都唔聽話，我會唔開心。譬如有次佢唔肯練琴，我嘗試先獎勵佢，話不如練一次，食一粒糖？但佢都唔肯，係要逼到我打。之後問佢，反正最後都要練琴，點解唔一開始有糖食時練呢？唔係開心啲咩？」
有罰，自然有賞。只要昭淳乖，肯做功課、幫媽咪手，便會獲得一個印仔，儲夠十個，便可以換禮物。「佢啲玩具，都係換番來。????家佢大啲，我想增加佢對金錢嘅概念，等佢揀換禮物或二十元，儲起來買鍾意嘅嘢。好似有時佢上完堂肚餓，我就叫佢用自己賺嘅錢來買麵包，唔可以用司機嘅錢。」

自己女兒自己教，她要女兒學識獨立，不要過分倚賴工人，否則是害了她。

去年聖誕，一家三口到新加坡旅行，不過隨着她的肚子愈來愈大，老公曾文豪已下禁飛令。

通過儲印仔換禮物，鼓勵女兒要乖，並趁機向她灌輸金錢概念。