有肌，唔一定要爆，一樣可以好爆。
你睇吓韓國嘅爆肌大叔馬東石，喺《犯罪都市》系列中，係咁打係咁爆，點估到佢會有大圖入面嘅花碌碌Look？
呢個其實係呢位五十一歲嘅大叔，喺新戲《肌智整容大叔》入面嘅造型，打少少但勁搞笑，呢啲咪係breakthrough囉。
演員喎，梗係要唔揀擇，任何角色都Carry吓，仲要Carry到，最爆！

收起麒麟臂，又着晒夏老威花恤，馬東石喺《肌智整容大叔》中，齋靠把口搵食，唔打人，嘗試新戲路，仲兼任埋監製，睇到咩呀你？野心囉。

睇得《機智醫生生活》多，硬係覺得鄭敬淏揸手術刀好Charm，今次係都係揸手術刀，仲幫人啪針添，醫美吖嘛，人哋係至Top嘅整容醫生嚟o架。

忍笑最強

馬東石嘅爆肌形象，怕且都唔使點介紹，但係佢喺《肌智整容大叔》入面，換上鮮艷嘅夏老威恤衫，變身掌管韓國時尚潮流指標嘅狎鷗亭揸Fit人，夠Surprise啦！
佢就話：「拍得好愉快，觀眾可以期待我哋嘅演技默契！喺拍嘅時候，我同鄭敬淏、吳娜拉等拍檔，成日都要一齊忍笑，先可以keep住演戲，仲難過我平時拍動作戲。」
鄭敬淏以話題韓劇《機智醫生生活》打開國際市場，今次佢喺新戲，就飾演擁有最強實力嘅整容醫生，「每次去拍攝現場時，我都好開心，工作人員、導演，仲有一眾前輩都好好。喺拍攝現場成日都充滿笑聲，我喺馬東石、吳娜拉兩位前輩身上，學到好多嘢，令我覺得好幸福！」
幸福嘅，仲有靠狗血韓劇《天空之城》（Sky Castle）打開知名度嘅吳娜拉，「I had a great time！今次合作得好愉快，我感覺到幸福！」
上映日期：12月1日

戲中嘅馬大叔，放低拳頭，轉落嘴頭都搵到食，仲搵齊腳開醫美中心，鄭敬淏同吳娜拉就係佢嘅Partner。

實不相瞞，鄭敬淏喺戲迷間有「鄭少女」之稱，即是佢嘅撒嬌能力，比少女更出色，呢個scene，係咪有啲hehe feel？