Encore得嘅，就梗係有番咁上下o架啦！睇大圖，你見到玄彬，好明顯係一大Selling point，加埋柳海真、「少時」潤娥（又譯允兒），就係電影《秘密任務》，喺五年前創下781萬觀影人次嘅卡士。
一等五年先有得Encore，《秘密任務2：International》除咗要等齊原班人馬，仲要Upgrade故事線到國際層面，加入新血Daniel Henney，再度吓新嘅動作、笑料，用誠意攞滿Fun！

玄彬喺《秘密任務2：International》中，再次飾演北韓刑警任鐵令，點旺佢法？未知o架，但係即將為人父嘅佢，仍然冇錫身演出眾多動作場面，出盡力賺奶粉錢嗰股熱誠，抵Like啦！

除咗玄彬、柳海真同潤娥Encore，拍得續集，卡士必然加碼，由Man到爆裂嘅Daniel Henney，飾演美國FBI，令成個「秘密任務」升呢至國際層面。

FF三角錯

《秘密》首集講南北韓刑警合作，搗破犯罪集團，今集就加埋美國FBI，將充滿陽剛味嘅Level提升，加埋玄彬同Daniel Henney嘅型佬味、柳海真嘅方法演技，呢個鐵三角，冇得輸。
另一個三角，係由潤娥主演嘅「姨仔」（其角色為柳海真妻子之胞妹）角色孭飛，上集佢經已視玄彬為Oppa，擔當笑料製造機，今集再見埋Daniel，梗係自動FF兩大型佬爭自己嘅畫面，睇預告已令韓國網民爆笑。
而玄彬就笑言：「我喺第一集冇感情戲，今集加入咗呢個元素，係好有趣嘅，不過我真係有啲失望，原來佢（潤娥）變心，可以係咁快！」
而FF主角潤娥，叫做「左擁右抱」，真係好似閣下想像中咁Happy。「呢個Job太幸福嘞！兩位前輩都咁有魅力，我每日開工都好開心。」

新血有顏值代表Daniel，實力代表就係《炸雞特攻隊》嘅陳善圭，睇相，怕且你都知佢係今集嘅疑似Big boss嘞啩？

柳海真一向以演技著稱，但《秘密》系列係動作片，呢位「萬年最佳男配角」都要親身上陣，兼顧演、打。

Daniel話，今次同玄彬「鬥戲」，令佢自動回帶至十七年前嘅韓劇《我係金三珣》（下圖），所以拍攝《秘密2》時好Enjoy。