楊家誠：伯明翰食梗阿仙奴？
早幾日一言出席中聯辦酒會，席間碰到英超伯明翰班主楊家誠，由於大家都係鍾意睇波之人，於是大談波經。伯明翰今年喺英超表現冇上季咁理想，依家正喺下游掙扎，之但係佢哋就打入咗聯賽盃決賽，以伯明翰規模，都算有交代。
不過，決賽對手係阿仙奴，喺英超排緊第二，排名高過伯明翰好多，最近仲贏咗地上最強嘅球隊巴塞，氣勢如虹，楊家誠點解咁有信心，好似贏梗阿仙奴？
聯賽盃決賽喺二十七日（即呢個禮拜日）舉行，當日原來係楊家誠生日，難怪佢會信心爆棚。一言都希望伯明翰可以o趙冧阿仙奴，楊生除咗可以將個聯賽盃作為自己份生日大禮外，更加可以為港爭光。
講開，二月二十七真係個特別日子，除咗楊家誠外，全國政協常委洪祖杭呢日將有愛駒出賽﹗洪祖杭早前靠「火龍駒」拉頭馬，贏咗一百三十幾萬獎金，洪常委心情大好，一言上周見到佢，即刻問幾時又有好消息，佢話可以留意吓二十七日嘅賽事。貼士無謂畀到咁明，大家各自各精采喇！
伯明翰班主楊家誠話聯賽盃對阿仙奴：
社民連三萬蚊飛鏢唔找數？
一言最近聽朋友講，早排好多風雨嘅社民連，近日又頻被追數。話說社民連舊年搵咗間飛鏢公司，訂造咗批以社民連黨徽做鏢翼嘅飛鏢，仲印咗「沒有抗爭，那有改變」的口號，舊年三月落訂，五千支飛鏢，總單價約莫三萬銀。
但到去年暑假，批貨做好之後一直都無人拎，飛鏢舖又聯絡唔到訂貨人﹗堂堂一個政黨，唔會走數咁賴皮啩？
社民連是非多多，最近仲遇人不淑，畀人走數。
一言生性八卦，四出打探，事情懷疑係社民連懷疑被人走數。話說落訂者係一名叫「Marcus」嘅中間人，佢代表社民連訂飛鏢，老闆起貨後就聯絡唔到佢。飛鏢舖走去追數，社民連話一直追問呢個「由朋友介紹」嘅中間人，但中間人一味拖。一時話去「度蜜月」玩失蹤，一時話「間廠未做起」。
拖吓拖吓，老闆批貨就擺咗喺公司大半年無人問津。一個中小企老闆，畀人拖數三皮，話多唔多，話少唔少。慘在佢信「社民連」呢個牌頭，一蚊定金都無收。一個開口埋口話為基層抗爭嘅政黨，竟然拖基層數，都幾可笑。
聽講有記者介入後，社民連即時聯絡飛鏢舖老闆，畀三皮找數，計埋之前交付中間人嘅錢，即係前後唔見六皮嘢。社民連形象已插水，加埋遇人不淑，破財但又未必擋到災；批飛鏢原本諗住係年宵時出擊，唉……一字記之曰：黑﹗
秦善文阿媽喊住搵仔
上星期，有報道指西半山樓盤天匯單世紀撻定風波有新進展，仲暗示撻定買家秦善文畀人拉咗！不過事件過咗半日，警方作出澄清，事件至今冇人被捕。一言知道，好多關心秦善文嘅人打電話問佢情況，秦善文接聽電話時反應好大，即時話自己身在荷蘭，傾緊注資，點可能被人拉。
佢好無奈咁講：「我就無所謂，最慘係我八十幾歲老媽子，晨早起身就聽到話個仔畀人拉，喊住打畀我，問我係咪呃佢話外遊，實際係畀人拉咗！你估家陣粵語長片咩！」
不過，秦善文都好樂觀，話唔會嬲間報社，但又話返香港會「出信」畀間報館，「始終我係商人，家陣又準備注資荷蘭間廠，要同銀行傾資金安排，點都要做啲嘢。」
秦善文阿媽以為阿仔被拉，虛驚一場。
一太月租二十萬殺落街舖
過去一年樓市咁旺，唔少經紀行部署擴軍，連帶外資物業顧問行都準備殺落地舖，跟華資行爭一日長短。聽地產經紀通天講，第一太平戴維斯就用高價租用九龍塘羅福道間屋，作為一太九龍旗艦店。
美聯（1200）幾年前曾經用月租十二萬，租毗鄰羅福道一號，今次一太更大手筆，月租成廿萬，僅次於中原依家根德道個舖，嗰度月租廿三萬。
通天話，一太大中華區行政總裁李偉文仲大大聲，講到明今次只係進軍街頭戰線第一步，集團計劃未來五年間開夠二十間分行，港島旗艦店短期會開業。
事實上，今天經紀舖位租金已直逼九七高峰，舊年底中原以月租近三十萬搶奪馬鞍山海栢花園二樓舖位，呎租接近四百元，相比起三年前美聯所畀租金高咗足足一點二倍，租金冠絕全行。至於九七年最貴經紀舖位，係喺華景山莊，月租接近四十萬。
