踏進六月，日間室外氣溫動輒三十多度，熱到爆錶，水上活動自然成為最佳消暑節目。
「大龍生」羅樂林的細女羅苡之(Tisha)，近日就迷上直立板，每星期都約埋教練出海玩。
「識玩一定揀日出時份出發，早上海水比較平靜，加上氣溫唔太熱，划出去一啲都唔辛苦。每次日出景色都有啲唔同，好夢幻，玩過一次真係會上癮。」

Tisha現在每個星期出海玩一至兩次，每次都book定教練同行，「沿途有人指導，水退時教練會提醒有邊度危險唔去得，除了技巧亦提升唔少安全意識。」

晨光第一線

家住西貢的羅苡之近水樓台，最近幾乎每星期都出海玩直立板，這天於沙下拍照，原本風和日麗，但天有不測之風雲，只是拍了十分鐘，藍天突然被大團烏雲覆蓋，繼而是一場兩小時的暴雨。她和教練上天文台網站查看，發現雷雨區未有接近，未待雨勢減弱，二人已踏上直立板出海去。羅苡之說：「天文台尋日預報明明話好天，不過落雨玩又係另一種體驗。」
熱愛運動的羅苡之，每到夏天特別鍾情水上活動，「其實好多水上活動如游水、wakesurf、wakeboard，我都啱，但因為之前斷過十字靱帶，今年想搵啲靜態少少嘅水上活動，上網搵到直立板，企喺度划，好似好簡單咁，於是搵咗個基本課程報名，八百幾蚊學咗一堂，發覺好玩喎，其實話易唔易，但話難又唔難。之後搵咗呢個教練，每堂千二蚊，一對一學多咗唔同技巧，如划嘅節奏同姿勢，開頭上板真係腳震震，佢俾塊『肥婆板』我用，因為闊啲容易平行啲。」
她跟教練分別於清晨、上午和黃昏不同時段都玩過直立板，發現最精彩是天未光就出海睇日出。「早上玩係最舒服，因為海面好平、好靜，但清晨四點要起身，五點前要出發，向東划四十五分鐘左右，便到達睇日出嘅海面，跟住就坐喺度，靜靜等太陽升起一刻，感覺好chill。」

教練Edmund除了教授直立板技巧，回程更替她拎板上水，服務周到。雖然每次一對一的教練費過千元，她笑言：「當食少餐，做運動投資落健康度，仲值得。」

之前一次出海玩直立板時撞正一場過雲雨，他們上岸後發現眼前出現一道彩虹。「次次出海睇嘅景緻都唔同，無論日出雲彩還是雨後彩虹，都令人一再回味。」