「無所謂啦！我OKo架！都好幾年啦！」
當說到自一六年跟何猷亨分手後，感情一直處於空窗期，單身近五年的陳瀅，輕鬆地說着。
被稱為「宅男女神」，竟然是單身，三十一歲的她笑稱：「我覺得『女神』呢個term，呢家好多人都鍾意用，個個都係男神女神，係一個禮貌嘅稱呼啫。
「人哋成日話我好多兵、好多人追，真係唔係！講極都冇人信，講真，如果我有拖拍，點會咁多年都冇人影到？我拍都唔會收收埋埋，我係好enjoy出街拖手同食飯。」
訪問這天，陳瀅多次強調自己處於單身mode，在出街未有手可拖的情況下，寄情事業的她，除了擔演作品接連播出，還正在拍攝首次擔正女一的劇集，為應付動作戲份，她更練習至雙腿瘀青。
「我OK嘅！為咗件事好啫。之前拍《愛美麗狂想曲》同《伙記辦大事》，為咗個角色我都嘗試去考電單車牌，但係我對兩個轆冇天份，考唔到。」
人生不是考牌，而是不斷的嘗試，陳瀅努力嘗試，暫時一個人也活得豐盛，自己OK便可。

 

呢啡 

截至上月三十日，劇集《愛美麗狂想曲》播畢前，TVB的兩線黃金時段劇集，也有陳瀅的蹤影。「兩個角色好唔同，『李小勇』（其《愛》劇中角色）好麻甩、好直率；『常笑』（其《伙記辦大事》中角色）就好多內心戲、難啲Handle。我啲friend睇咗《愛美麗》，都話我平時就係咁嘅樣，但係我好少將呢一面公開。
「我只係將平時陳瀅有嘅boyish（男仔頭）性格、麻甩嘢同核突嘢，放大十倍去create個角色啫。」
說她表裏不一，她還自踩多一腳。「我好呢啡o架！有好多麻甩嘢，之前我好唔鍾意洗頭返工，最高紀錄係七日冇洗！而且我唔會覺得唔好意思，連公司啲梳化服（髮型、化妝及服裝）嘅同事都習慣咗，望一望我個頭，就問：『今日第幾日呀？』雖然頭髮唔『立』、冇味、頭皮又冇痕，但o依家諗番都幾核突。
「最後係因為，啲頭髮噴得太多次hairspray，太硬set唔到，我就喺第七日洗頭。我啲friend話，我咁樣好適宜坐月，一樣唔洗頭。哈哈！」
陳瀅還灑脫地說：「我唔怕嚇走想追我嘅人，呢幾年都冇人埋身，所以我完全冇機會嚇走任何人！」
即使未有人埋到身，「麻甩」的她，對另一半還是有要求。「價值觀要同我好相似，好多時有抝撬，都係因為價值觀唔同。我以前有一個男朋友，對錢銀嘅價值觀好唔一樣，我個人呢啡，成日呢度攝十蚊、嗰度攝廿蚊；利是錢就唔係好唔掂都唔拆，但係周圍擺。嗰個男朋友見到，就會叫我將啲錢放好啲，咁就會有抝撬。」

自言在清談節目《Tiger’s Talk》太大膽玩大咗，但陳瀅再三強調，她跟方力申只是好朋友。

胞姊及不少好姊妹也已為人母，但未找到另一半的陳瀅，則表示希望自己於三十五歲前，會結婚生子。