說母親是「神奇女俠」，絕不誇張，看單身十八年的余安安，於〇三年離婚後，為賺錢養家，不惜以水着Look復出大銀幕，含辛茹苦捱大兩個女兒。
現在大女文琪是律師，快將為人母；細女文騫則於畢業回港後，任職市場營銷。「我從來唔會迫佢哋，佢哋開心就係一切！養兒一百歲，長憂九十九，到我瞓低嗰日都仲憂緊，就算佢哋幾大個，我都係唔放心。」
六十一歲的余安安，近日再次現身大台，夥拍兩位星級媽媽陳凱琳和羅敏莊，主持綜藝節目《日日媽媽聲》，代表50+界別的母親。六月準備做婆婆的她說：「o依家係to be（未來的）啫，未係婆婆。以前覺得，婆婆呢個名好似好老，會未接受到，o依家好感恩，覺得係福氣。」
神奇的母親，就是能吞下所有的苦，只為女兒一個笑容。

余安安開心地等待六月升呢做婆婆，她已講明只會玩，不會幫忙湊，因為湊大兩個女兒，已經足夠了。

曾經歷戀愛大過天的她，當日對女兒拍拖，只能處之泰然，「我唔會出聲，俾返自由佢哋，只係提點吓佢地小心啲，要愛惜自己。好難教佢哋點揀，我當然唔想佢哋行咁多冤枉路，但呢啲都會變成經驗。」

日日母親節

訪問約在傍晚六點半，重返電視的余安安，於訪問後還要趕着入廠。首次主持關於育兒的綜藝節目，她坦言被好友徵召「入伍」。
「志偉開聲，我一定幫！主持呢類節目轉數要好快，我哋又會分享自己經歷，我同啲女會一齊睇番，尤其大女o依家有BB，睇咗有好多得着，不過我啲女就唔會做嘉賓嘞，佢哋比較低調。」
一六年，其大女出嫁時，余安安曾言未接受到「婆婆」這稱呼，認為很難聽，惟當緣份到，她既驚且喜。「以前我覺得『婆婆』呢個名好老，o依家覺得做婆婆好有福氣，好感恩！年輕人自己會教小朋友，我就唔會干涉太多嘞，但係如果佢哋問我，我都會俾意見嘅，不過唔會要佢哋跟我嗰套。」
本周日便是母親節，她的指定節目依舊是三母女吃飯慶祝，「我成日話如果佢哋乖，就日日都係母親節。有時會懷念佢哋細個嘅時候，嗰時佢哋無錢，會做好多手作仔俾我。
「記得有次佢哋知我好鍾意買嘢，就剪咗好多衫、手袋、鞋⋯⋯貼晒落畫紙度，七彩繽紛，好靚！又會造泥膠公仔、串珠鏈，我收到好開心，佢哋喺屋企匿埋整，唔俾我知，o依家大個咗，無咁多時間就會買禮物囉。」

大女文琪在一六年與澳洲籍男友Jeremy結婚，自此余安安便多了半邊仔。

她是香港電影工作者總會副會長，與會長古天樂交情甚篤。