Yet To Come 譚凱琪
約譚凱琪做訪問,除了文字,相片同樣重要,構思時攝影師給了我兩個選擇:「冷艷?少女?」
最理想是Why not both,但我反問:「暖媽?」
四十歲的譚凱琪,結婚兩年,女兒Baby G現已一歲半,幸福人妻、人母一枚。而正在播映的《十八年後的終極告白2.0》,是她產後復出的首個作品,暖媽concept,她一定carry得起。
豈料當事人聞言,秒速彈鐘:「唔好啦!結咗婚、生咗小朋友,一樣可以冷艷可以靚!好似我嘅事業心咁,我仲想闖一番事業o架!」
於是扑鎚冷艷,為了美感,譚凱琪還脫掉高跟鞋,赤腳擺甫士,做雜誌訪問如是,做正業拍劇的瞓身度,可想而知。
「就係因為有咗小朋友,我都會想俾啲成績囡囡睇,希望佢讀書,或者以後喺做嘢方面,都有一團火、一個向前嘅心。」
即是去到一個被迫聽〈Baby Shark〉的階段,也不代表你不可以聽BTS,身份多了,不代表要忘記初心。步調依舊,還多了摯愛同行,迎接尚未到來的章節,不是更加圓滿嗎?
攬炒姐
說演技,譚凱琪曾經連續六年獲得《萬千星輝頒獎典禮》的「最佳女配角」提名,即使未能捧獎而回,大概也是一個給她的肯定。最近她於《十八年後的終極告白2.0》的表現,也贏盡話題性,歇斯底里的演繹,令網民封她為「攬炒姐」,大大提高他們的投入感。
「其實拍攝嘅時候,我係有一定壓力嘅,因為生小朋友嘅關係,我有差唔多兩年嘅時間,冇拍過任何劇集,會擔心係必然嘅,加上當時生完BB幾個月,身形仲未回復,有啲腫腫哋,於是就俾咗好多壓力自己。
「我同阿Shaun(譚俊彥)、山聰最多對手戲,佢哋都好好,不斷鼓勵我,幫我排戲排到好先至拍。初時我都未係好搵到演Queenie(其角色名)嘅模式,阿Shaun幫咗我好多。」
劇中的角色既癲喪又有心機,厭惡度極高,譚凱琪收工時,有時難免未出戲,把角色帶回家,「平時嘅我係比較靜嘅,唔會好似個角色咁潑辣,所以都用咗好多energy去演,日日開工都要鬧人,都會帶到啲情緒返屋企,我老公就首當其衝,哈哈!不過,當我一見到個女,就好自然咁開心番。」
角色一早魂歸天國,譚凱琪也要「演到死」,過程令她甚為難忘,「拍我拜拜嘅過程,由死亡到殮房再到靈堂,我覺得自己真係經歷一次死亡咁,見到自己張『遺照』,我都真係毛管戙。」
轉眼間女兒已一歲半,譚凱琪稱,跟老公還未有計劃追多一個。
女兒的出生,一度令她收起事業心,專心育兒,屬心力跟體力的勞動。
二〇年跟拍拖八年的莊日宇成婚,婚照中的新娘,笑得幸福。