每一個十年 黎耀祥
人生有幾多個十年?無人確實答到你,但可以來個Case study。
2010年,黎耀祥是TVB首個冧莊視帝,〇九年他首獲殊榮前,他用上了多過兩個十年,於叢林中游走,才攀得上這個視界頂峰。
「我唔會成日諗番以前,因為嚟緊嘅仲有好多,但係我都會睇番自己以前嘅戲,都睇到自己好多缺點。」
2020年,是黎耀祥入行的第三十五年,在新劇《殺手》中,五十六歲的他罕有地既打又晒肌。「我入行咁耐都未試過,辛苦係辛苦嘅,咁多年我好多角色都做過,係未除過衫,咁咪的起心肝做囉!」
所以,「人生有幾多個十年?」並非要深究的問題,黎耀祥的親身體驗是:「我成日都話,如果我嘅成功嚟早咗十年、二十年,咁我可能唔係咁樣嘅人。人係要不斷去學習,每個階段都喺度學緊嘢,喺唔同嘅階段,就有唔同嘅體會。」你仲諗?做啦!
50路的男士要操肌,黎耀祥稱要有恆心,飲食加上重運動量,他用了一個月時間便有成績。
劇中的打鬥場面多,黎耀祥稱拍攝時,產生自己是武打明星的錯覺。
殺氣背後
現在每晚也在《殺手》見到的黎耀祥,中年潦倒,說好的殺氣並未散發出來,他笑指要等到廿幾集,視迷才能與他的腹肌相見。
「初頭監製(陳維冠)冇話要除衫嘅,我都五十幾歲咯,操唔操到o架?但我又覺得,除咗衫,俾觀眾睇到操練過程,個戲劇效果會更加大。好彩,同期有阿Mo(陳豪),佢喺操肌、減肥上好有經驗,佢教識我點計卡路里,做啲咩運動去減脂肪。
「我開工嘅時候,可以成日唔食嘢,嗰陣我會自己帶烚菜、烚雞扒,呢套劇又有好多打戲,運動量大,所以個半月就見到成效,啲肌肉就出咗嚟。」
劇集於一八年尾已完成拍攝,但訪問這天,黎耀祥仍保持到零肚腩,全因他正為新劇瘦身,連帶黎太Julia也跟丈夫一同keep fit。
「我喺新劇飾演泰拳拳手,只係比賽先要除衫打拳啫,只係要我打兩場!拍《殺手》打到我驚,仲要次次都冇乜替身;成日要跑,有時起碼跑幾百公尺,好甘!
「有一次唔知係熱身唔夠,定係因為要忽然要咁大量咁跑嘅關係,我左邊膝頭哥腫晒,我以為返屋企,敷吓冰搽吓藥膏唞吓就冇事啦,點知唔得⋯⋯嗰時又開緊工行唔開,keep住拍keep住腫,卒之成個月之後都係要去睇脊醫,針灸同電療先消到腫。」
家庭為黎耀祥早年奮鬥的動力,即使現在他已名利雙收,他稱家是他感覺最安穩的地方。
現時囝囝於美國讀大學,疫情前,他跟太太有空便會赴美探仔。