美國QE2來勢洶洶，熱錢滾滾東來，呢一波衝擊唔係嘢小，據官府線人回報，煲呔同鬍鬚曾已金睛火眼「目及」住QE2對香港有幾大影響，即時評估有二：一是泡沫化會加劇，資產勢被進一步炒高，特別係樓市；二是通貨膨脹正殺埋身，加價潮會帶起市民怨氣，唔可以忽視。

線人話，政府亦睇到呢兩個月樓市不跌反升，皆因息口持續低企，資金紛紛尋找出路，而內地到近期仍不斷「放水」，加上人民幣升值，大陸錢源源不絕流入樓市，高價樓有過兩成由大陸佬購入，好多揸住等升值，個價點會唔升？個市本來已㷫烚烚，如今QE2又出籠，更多熱錢湧去新興市場，樓市想唔升溫都幾難。中上價樓炒熱後，必然一層層蔓延到中下價樓，炒風好可能愈吹愈烈。

鬍鬚曾最擔心係樓市繼續炒熱，已準備招數壓抑炒風。

形勢的確極之不妙，但煲呔同鬍鬚曾有幾道板斧唔出得，例如香港息口要跟美國，唔可以靠加息抑制樓市；香港亦唔可以管制資金流入（經濟自由排行榜香港向來排第一，呢樣嘢唔可以變），或者學內地限制每個人買樓數目（炒家開幾間公司買樓都得，好難管到）。

重招出唔到，剩落嚟option只有一個，就係針對炒家大力出擊，打到佢哋痛，暫時縮手離場，個市就可以退吓燒。線人話，有幾招正考慮中，包括再提高中上價樓嘅印花稅，增加交易成本；減低同類物業嘅按揭成數，令炒家借錢冇咁易。除咗呢兩招，政府進一步仲可能對短期內買賣嘅物業徵稅，擺到明打擊短炒活動。

線人指，政府何時出招仍要睇個市點發展，因為QE2可能仲會加碼，下一波唔知有幾勁，大陸則可能大力調整貨幣政策，收緊銀根，前者會再煲熱樓市，後者就有冷卻作用，總之變數甚多，所以要睇埋呢兩個月乜環境至決定落手幾重。

對於通貨膨脹問題，大陸加價潮澎湃，香港日用品必然漲價，對呢種「輸入通脹」，政府冇乜嘢可以做，因為香港係自由經濟，管制唔到物價，所以政府要壓抑通脹只能在樓市入手。有人認為鬍鬚曾應該再派錢紓民困，但呢招又會刺激通脹，政策自相矛盾，未必係上策。

鬍鬚曾正草擬下一年度財政預算，據知樓市與通脹問題將是重點，但遏止炒樓嘅招數可能等唔到財政預算，分分鐘兩三個月內就陸續出籠。

大陸加價潮帶動香港食品漲價，政府亦無符。

大家樂撞板穿頭 大企業急揾政治顧問

大家樂扣飯鐘事件成為全城熱話，工會已攞晒「架生」準備大玩一場，最後老闆陳裕光決定收回成命，總算避過一場劫數，但公司已焦頭爛額，形象損害甚大。一位公關老行尊直言，大家樂今次搞成咁，可以話係政治公關策略全盤失敗嘅textbook case，證明高層行政人員善於管理同計數，但對政治就極之遲鈍兼無知，如果佢哋一開始就搵高人做軍師，就唔使搞成咁。

大家樂老闆陳裕光未打過政治仗，敏感度不足，手下又冇政治軍師，以至撞板撞到焦頭爛額。

據行內消息，今次事件爆出前後，大家樂一直無請公共事務顧問幫手，公司內之公關部門，只負責市場推廣，無人識政治，及至爭議升級，公司多面受敵，高層出嚟解畫弄巧反拙，到收回決定前五日（前周一），至打鑼聯絡幾間大型公關公司，急搵專家去救亡，但此一燙手山芋無人敢接，大多數婉而拒之，到星期四仍然未有着落，直到最後關頭，民主黨前中常委盧子健間公關公司至肯接個job，大家樂隨即果斷「止蝕」。

經此慘痛一役，一些大企業忽然「醒」咗，知道「你不理政治，政治理你」，開始考慮搵熟悉公共事務嘅公關公司幫手，甚至聘請全職政治顧問，日後幫公司見招拆招。聞說一間以租務為主嘅大財團，正積極物色此類專才加盟，而一間駐香港嘅大型跨國集團，亦已委託獵頭公司尋覓政治公關顧問。

大企業改變思維仲未算遲，問題係呢類人才極之短缺，有能力有經驗嘅多數想做議員或做官，唔願同大老細打工，財團就算出得起錢，要請到高手亦非易事。

政治公關高手盧子健臨危受聘幫大家樂拆彈。呢類專家將愈嚟愈搶手。

黃華麒通波仔 三煞位難揾人坐

早幾日碰到某港台老友，講開頂爺黃華麒身體狀況，佢話麒哥上月突感心翳，入院一check，原來兩條心血管塞咗，唔做手術隨時瓜得，結果同佢通咗兩個波仔，總算大步檻過。

老友話，好彩麒哥返番政府做，以公務員身份入院，手術費平好多，如果在私家醫院做，淨係兩個波仔都要成八萬，加埋手術費要成四十皮，唔講得笑。

麒哥大病初癒，比以前惜身好多，睇嚟呢個三煞位唔想再坐好耐，可能明年二月約滿就拜拜，但政府至今未搵到合適人選頂替。

廣播處長黃華麒被「夾」到心臟病，佢個三煞位好難搵人坐。

線人話，政府最想係搵個AO（政務官）空降港台揸旗，唔想在內部提升，因為兩個助理處長張文新與戴健文升任此職都有問題，前者兩年後便退休，後者年前已曾參加聘請處長面試，但未入圍，說明佢老哥不在理想人選名單之內。此外，港台內派系分別，激進派早已形成「惡勢力」，政府知道如升港台中人，好難鎮得住班友。

不過要搵AO坐呢個位絕唔容易，須知港台早已被激進派盤踞，例如吳志森之類，以「言論自由」的金剛罩護身保住份工，邊個掂親佢就反咬，麒哥咁高道行，都鬥唔過佢哋，慘成夾心人，所以冇AO肯捱義氣孭呢份dirty job。

華叔病情轉差 最新相片不及前精神

華叔患癌初期病情曾一度樂觀，但線人話，近期佢老人家的癌指數又再復升，身體有轉差之勢。最近何俊仁等去醫院探華叔，合照登上仁哥嘅facebook，相中所見，佢老人家病容比前明顯，似乎病情重咗。

線人話，華叔一直在醫院留醫，出外要向醫生要求，所以佢近日已極少參加公開活動。支聯會本月二十八日會改選，預料華叔會連任做主席，但屆時佢能否到場，仍是未知之數。

何俊仁去醫院探華叔，佢老人家睇嚟病容比前差咗。

田少酸溜溜 亂彈關愛基金人選

關愛基金督導委員會名單上周公布，當中商界人物唔多，只有「經濟動力」林健鋒、總商會主席肥胡及大劉愛兒劉鳴煒。串連富豪搞慈善基金，最初由田北俊提出，但佢今次完全攞唔到彩，自然心心不忿，所以佢私下向人放料，批評委員會唔重視商界，有份捐錢冇份參與。

呢番意見後來出咗街，有商界人士好唔贊同，認為富豪態度剛剛同田少相反，根本唔想加入委員會揸fit，因為日後必然被人指摘操縱基金運作，隨時成為箭靶，最好係避得就避。

田少攞唔到彩，在背後抨擊基金成員名單。

葉太旗下金童玉女 共處一「室」結良緣

葉劉組黨一事，至今未有新進展，不過佢個大本營「匯賢智庫」最近辦喜事，可以沖喜一吓。

上周六，葉太愛將黃楚峰大婚，新娘乃葉太得力助理Joanna，可以話閉門一家親。

David（黃之洋名）原來係AO，佢放棄高薪厚祿，投入葉太旗下，在地區艱苦拼搏，葉太知道佢打得，將第一個地區辦事處（大坑）交畀佢開山劈石，佢三年前當選區議員，站穩山頭。

佢贏得區議員議席後，葉太派Joanna去幫佢手，兩人並肩作戰，日夕相對，結果撻着，這雙葉太身邊的金童玉女終於拉埋天窗，今後齊齊為新黨拼搏。

葉太愛將David同Joanna拉埋天窗。