名嘴飯局盛惠五萬
做財經好搵大家都冇乜異議，但即使周邊行業，都可以有唔少利益，好似財經名嘴，近年就好吃香。由於佢哋有知名度又有傳媒地盤，啲上市公司老細又想班大哥大姐美言幾句，於是頻頻邀約見面，大魚大肉不在話下，周不時仲奉上股票貼士；加上名嘴本身份人工，又寫吓專欄出吓鏡，收入都幾和味。
之但係既要講股又要返工，邊有咁多時間？特別咁多上市公司，稍有名氣嘅財經名嘴簡直應接不暇，於是乎有啲公司要見名嘴，就要好似啲富豪約女明星出席飯局，咁即係點？直接講咪畀錢囉！
老細要請食飯，需付費先請得郁某啲名嘴，聽聞話市場有啲星級名嘴收費隨時要三到五萬銀。嘩，你話幾巴閉，食頓飯要幾萬銀，唔知遲吓會唔會好似股神飯局，要放喺網上畀人競投？
補習天王好搵，但都未必比得上財經老師。
星級名嘴有知名度又有傳媒地盤，不少上市公司老細都想邀約見面。
財經老師好搵過補習天王
經世界千奇百怪，過去大家以為開補習社好搵，補習天王隨時年薪幾百萬，羨煞旁人。但一言知道，依家有個新興行業，收入絕對媲美補習天王，每個課程收費吓吓兩三萬，整個課程約莫十堂，每班講緊六七十人，一班收入已過百萬。呢行係乜？咪就係辦投資補習班嘅財經老師。
呢啲財經老師部分係財經名嘴，有啲係做證券或者期貨經紀，佢哋慣常手法係喺報紙雜誌大賣廣告，話有免費財經講座，名額十分有限，有興趣者要預先留位。到講座時，講解投資知識或心得的時間唔多，但就不斷宣揚自己威水史，講到自己幾掂幾有料，總之就希望將你洗腦。
然後就會向出席者推介課程，例如乜嘢期指或期權投資、乜嘢技術分析，甚至乎必贏秘技等等，總之收費個個都萬萬聲。
財經老師好識捉心理，會跟學生講，唔係有錢就可以參加，佢會畀份試題啲與會者，要達到某個分數先會接受，無他嘅，等你覺得唔係人人可以參加，咁先矜貴嘛。同時，佢又會話，若果即場報名，費用會較原價平三到四成，目的不外乎要逼你早決定，情況有點似發展商賣樓，唔畀時間你想清楚。
佢最精明處，就係即場報名嘅收費金額，通常跟政府持續進修基金個上限金額相近，而佢哋啲投資課程又已經攞到政府認可，咁樣啲報讀人士就幾乎等同免費報讀。既然所費無幾，財經老師又講到個課程幾咁有用，試吓都無妨。
最貴課程每小時過萬元
唔好以為定價貴就冇乜人讀，偏偏相反，原來班財經老師經過分析，發覺人好奇怪，收得平啲人會認為冇料到，反之收得貴先覺得好嘢，簡單講係貴先有市場。行內有位老師，誇張到開一堂收兩至三萬，成堂只有兩個鐘，即係話每小時收費過萬。
不過，上完呢堂後，佢未來一年每日會畀個貼士啲學生，透過呢啲貼士炒期指，成功率極高。至於貼士係乜，最終又準唔準，一言未試過唔敢妄下判斷。呢位老師仲話，佢教過唔少高官，一個課程動輒數十萬，一言都奇怪，究竟邊個高官咁捨得肯用咁多錢讀呢啲課程？
重慶做到點解香港做唔到？
政府施政報告針對發展商新樓發水面積，新規定下，發展商以後起樓最多可發水一成，相較過去的三成來講，已大大收窄，並且建議賣樓時以實用面積計算均價。但有個別發展商牙痛咁聲，話買家習慣以建築面積計價，倘以實用面積計，均價驟眼看好似好高，畀人一個錯覺。
一言就認為，禁發水好合理，至於以實用面積計均價，更加係德政，無理由反對。查實呢方面香港真係連內地一個二線城市也不如，現時重慶賣樓，全以套內面積計，所謂套內面積，即係相等於實用面積。既然人家可做到，香港實在沒有道理做不到。
早前有發展商以「叉鵝飯」同「吃牛扒」做比喻，聲稱發水樓都有市場，各人口味唔同，咁嘅說話都講得出，難怪內地愈來愈看不起香港。早前中國海外（0688）帶人去珠海參觀新盤銀海灣，就不忘幽香港啲樓盤一默，話中海啲樓盤幅牆特別薄，似一位身高一米七五的女性穿着旗袍，能展現出靚女美好身段。相反香港好多發水樓，啲牆又特別厚，好似位靚女着厚大衣，看起來梗係有啲唔舒服。
中國股神趙丹陽（左）跟畢菲特食一頓飯，就花去近千七萬。
