加強保安至反恐級 立法會全球獵頭

立法會經歷「七一衝擊」後，多處設施被破壞慘不忍睹，有議員估計維修費用超過半億。花錢維修事小，呢次衝擊突顯立會原來不堪一擊，保安設計更係漏洞處處，令唔少議員驚訝。主席梁君彥近日四出向議員收集意見，度吓如何提升保安水平，高度設防嘅銀行大廈，都係佢參考之列。
有建制議員透露，唔排除將立會嘅防禦級別提升至反恐水平，「呢家立會伺服器房嘅設計一踢門就開到，太危險，應該參考部分銀行總行做法，將佢設喺地庫，有重重磚牆包圍，不易被攻破。」要搞到咁專業，立會相關人士呢排惟有四出物色有國際反恐經歷嘅專家，就保安設計、防禦物料等畀意見，
不過提升反恐層次唔係一時三刻搞得掂，預計十月中立會重開後，隨時半年至一年先會逐步做！

設計新穎嘅立法會大樓喺衝擊風波中不堪一擊，防禦能力成疑！

有議員提議將立會保安提升至反恐級別。