因「安心偷食」影響，黃心穎形象直插谷底，累及有份主演的無綫重頭劇《法證先鋒IV》要重拍，更由湯洛雯執二攤頂上。臨危受命的湯洛雯，被監製要求減肥十磅。雖然多管齊下，但她卻愈減愈肥，臉上又生了粒粒，還傳出她在拍攝期間狀態麻麻。日前，拍攝外景時，她的臉部略顯浮腫，又不諱言有壓力，更自認變了「NG王」。

黃心穎跟湯洛雯私下是好姊妹，二人合演的《丫鬟大聯盟》上映無期，湯洛雯還要頂替她《法IV》的角色，總算為她執手尾。

面部浮腫

執黃心穎二攤重拍《法證先鋒IV》的湯洛雯，近月新聞多多，繼開拍前積極跑步減肥，卻不慎拗柴，結果搞到負傷上陣之外；隨後，她靠地獄式節食、按摩排毒等多管齊下減肥，可惜減極都唔瘦。此外，開工期間，她臉上又狂生暗瘡，拍劇時還狂食螺絲，似乎壓力爆煲！

日前，湯洛雯跟陸詩韻在黃金海岸附近的沙灘拍攝外景。當日劇情講述，飾演記者的她，前來採訪闊太陸詩韻，但遭其助手阻攔，搞到她面燶燶離開。事後，湯洛雯繼續暗中追訪陸詩韻，偷拍到對方當街鬧助手的惡行，跟平日高貴的形象大相逕庭。而在偷拍時，她發現有途人突然心臟病發，即急call救護車求助。現場所見，由頭包到落腳的湯洛雯，面部浮腫，雙下巴乍現，減肥明顯未見成效。不過，工作專業的她，到埗後都有跟對手交流及研究對白，才正式埋位，由於是文戲，導演拍了幾take便收貨。

由於僅得半個月時間準備《法IV》，湯洛雯早前也承認拍這套劇時比較緊張，「第一日開工，我的確係未warm up，NG咗幾次，變咗NG王。好彩，黃浩然同譚俊彥都好有耐性，如果唔係，我會愈嚟愈驚。其實，拍之前係最大壓力，拍拍吓就好番少少。」對於不斷NG？她直言︰「因為要喺短時間記好長嘅對白，我口齒唔夠伶俐，呢方面要加油。」幸好，她當日的情況已大有改善。至於減肥未如理想？她說︰「（身形）都唔係好過分，不過拍完劇後會重拾健康生活習慣，戒除一啲壞習慣，多做運動，呢個月真係冇時間做運動。」她強調自己冇肥，只是一向圓潤，以及可能跟水腫有關。

臨危受命頂替黃心穎的湯洛雯，接拍《法IV》前奉命要減十磅，但在強大壓力之下，她卻愈減愈肥，面部浮腫，兼且雙下巴乍現。

其中一幕，湯洛雯見到途人心臟病發，即不介意落手給對方餵藥。

劇情講述，記者湯洛雯趁闊太陸詩韻有空檔，即火速上前追訪她，但卻遭到對方的助手阻攔。