《蘋果日報》鬧鬼 員工八卦陣辟邪
《蘋果日報》近日先後有五、六名同事升職加薪，表面上喜氣洋洋，但原來將軍澳大樓二樓盛傳鬧鬼，搞到部分記者人心惶惶，要買八卦放在枱頭辟邪。
話說一個月前某個晚上，有《蘋果》記者在港聞組附近的開會地方，無故聽到女人的喊聲，「大家最初以為有人在附近播片，或是電視機聲，點知行勻成層樓，都唔見有同事睇緊片。」有員工估計，由於《蘋果》大樓鄰近垃圾堆填區，有棄屍都唔定，而這把淒厲的女人喊聲，久不久就有記者聽到，甚至有聲稱曾學道的員工說，見到女鬼在會議室喊，講到似層層咁款。
為求工作安心，有《蘋果》記者買八卦放在枱頭趕鬼。
由於「動新聞」記者坐在鬧鬼的地方附近，有人驚到要調到港聞組的位置工作，怎料仍聽到喊聲，曾向報館高層求助但不果，唔知是否因為老闆黎智英（小圖）是天主教徒唔信邪有關。部分記者為求安心工作，惟有自掏腰包買八卦放在枱頭。
九年前，英文報章《南華早報》位於太古坊的總部（現已搬離）亦曾鬧鬼，搞到班鬼佬心慌慌，管理層要找來永惺法師派出高足到報館誦經驅鬼。相比起《南早》的處理手法，《蘋果》似乎闊佬懶理得多。
