張達倫「暖爸」原來係大細路
張達倫同太太陳鳳玲(Kimmy),自從生咗囝囝張凱碩(乳名:「勁秋雞」)之後,化身廿四孝「暖爸」,無論喺佢社交網,定係私底下,都經常提住囝囝,晒父子溫馨。
早前,東姑就喺中環添馬公園,見佢同鄭子誠開工為劇集《白色強人》拍外景。劇中,鄭子誠飾演衞生局局長,而達倫就飾演醫法局主席;飾演專業人士可以話駕輕就熟嘅佢,穿着一身西裝骨骨,再畀工作人員幫佢化妝set頭,整到個頭靚立立,成個成功專業人士嘅look即刻出晒嚟,造型認真維肖維妙。
不過,東姑私下認識嘅佢,其實並唔係咁嚴肅認真。好似嗰日佢同「一定有陰謀」嘅鄭子誠,拍一場喺公園飲咖啡傾偈嘅戲,佢就鬼鬼馬馬,用鼻聞吓杯道具咖啡,似係擔心呢杯嘢,唔知飲唔飲得落肚?而聞完之後,佢就擺出一副心知不妙嘅表情,仲同對手鄭子誠開玩笑,一齊笑到肚攣,睇嚟佢都幾大唔透。
而當日順利完成拍攝之後,達倫立即急急腳趕去港鐵站搭車,畀東姑一眼(目及)到佢連電話嘅wallpaper,都係囝囝「勁秋雞」嘅寫真靚相。相信佢雞咁腳都係趕返屋企湊仔,呢個「暖爸」,真係一啲都唔似佢演嘅角色咁coolo架!
喺《白》劇中飾演醫法局主席嘅達倫,西裝打扮之外,仲要梳到個頭靚立立,演專業人士更入型入格。
工作人員將道具咖啡交到佢手之後,達倫第一時間聞一聞、索一索,睇吓杯嘢到底飲唔飲得落口。
達倫一副心知不妙嘅表情,睇嚟杯咖啡肯定有「景轟」,仲同鄭子誠開玩笑,大家笑到肚都攣。
《白》劇將於六月十日首播,達倫飾演嘅醫法局主席,除咗鄭子誠之外,同飾演醫院高層嘅郭晉安都有唔少對手戲。
完成拍攝之後,達倫好似裝咗摩打腳咁,趕去港鐵站搭車,相信都係趕住返屋企。
達倫呢個廿四孝「暖爸」,時刻都心繫囝囝「勁秋雞」,仲將囝囝啲相設定做手機熒幕畫面。
達倫太太Kimmy,前年一索得男,誕下「勁秋雞」,囝囝o依家一歲半大,非常精靈。