黃竣鋒力撼兩大影帝

一二年亞洲先生季軍嘅黃竣鋒（Jason），憑住fit爆嘅身形加入影壇，更因為喺電影《追龍》飾演「公仔強」一角，片中追殺劉德華嘅一場戲，展現非凡嘅身手與演技，而備受讚賞，仲令佢成為王晶旗下嘅一員猛將，有大片一定預佢一個角色。幾個月前，黃竣鋒就有機會同兩大影帝梁家輝、古天樂合作，一起合演咗王晶嘅新作《追龍II：賊王》，而套戲將會喺六月頭上映。

呢齣電影係改編自當年張子強綁架富豪嘅案件，黃竣鋒喺戲中飾演綁架集團主腦梁家輝嘅好兄弟「火豹」。o依家身處橫店拍緊網路大電影嘅佢，就同東姑講：「其中有一場戲我要用條毛巾撳住古天樂嘅口同鼻，由於我緊張過頭，非常大力，撳到佢個鼻又紅又腫，我都唔好意思。」除此之外，令佢最深刻嘅就係，其中有一幕要狂食榴槤，當時真係食到反胃兼想嘔，搞到佢o依家見到榴槤都好驚！

其實，為咗將身體keep住喺最佳嘅狀態，黃竣鋒就經常相約好兄弟、住在深圳嘅林俊賢一齊操。除咗做gym之外，佢哋仲不時相約去游水，一來可以鍛煉肌肉，二來又可以曬黑肌膚，一舉兩得，唔怪得知佢有咁健碩嘅身形啦！

黃竣鋒同東姑講，入行以嚟，佢最欣賞嘅前輩就係梁家輝，因為佢完全唔使培養情緒，一埋位就可以演技大爆發。

喺《追II》中，黃竣鋒飾演綁架集團主腦梁家輝嘅好兄弟「火豹」，成班手足一條心，一齊做世界。

黃竣鋒話自己喺演技方面，仲係一個新人，每一次開工都要好努力去揣摩角色。

喺片中，古天樂係一個卧底，混入梁家輝嘅綁架團隊之中，而黃竣鋒就負責不停去試探佢。

黃竣鋒話古天樂係一個非常知人善任嘅前輩，拍攝期間，仲專登幫佢加插咗幾場戲，令佢有好多發揮嘅機會。

有胸肌、有腹肌兼且有人魚線，黃竣鋒嘅健碩身形，絕對係佢嘅賣點。

黃竣鋒經常去深圳搵好兄弟林俊賢聚舊，佢兩個仲不時約埋去同陽光玩遊戲。