李添勝風騷睇中醫

現年七十一歲、無綫榮休金牌監製李添勝（添哥），在職期間，監製過唔少經典劇集，包括多部改編自金庸小說嘅武俠劇，譬如：《鹿鼎記》、《神鵰俠侶》，仲有好多叫好叫座嘅劇集，好似《巾幗梟雄》系列都係出自佢手，同埋唔少巨星都係佢一手捧紅。

早前，東姑就喺九龍城撞見佢，雖然佢撐住支枴仗，似乎隻腳唔多靈活，不過睇落就精神奕奕，身體仲好壯健，心情更加風騷。而擔住支牙籤嘅佢，似係啱啱食完中午飯，入咗去區內一間頗有名嘅中醫藥材舖，向店員攞咗幾包中藥。

東姑仲聽到佢聲如洪鐘同店員有講有笑，店員問佢使唔使要幾包山渣餅返去送藥，佢就話唔使，又講笑話：「你估我係細路仔咩！」兩人嘻嘻哈哈「打牙骹」咗一輪。雖然佢嚟睇醫生，但係相信都係啲小毛病，反而退休生活，樂得輕鬆同埋清閒，東姑都戥佢開心。

現正享受住退休生活嘅添哥，擔住支牙籤去中醫藥材舖度執藥，相信都係小毛病冇大礙。

似係中醫藥店熟客仔嘅添哥，同店員有講有笑，仲得閒到吹吓水，打咗陣「牙骹」。

當日所見，添哥精神唔錯、聲如洪鐘，不過就撐住支枴仗，睇嚟隻腳有啲問題。

一六年三月，添哥榮休晚宴當晚，劉德華就以神秘嘉賓現身，並頒獎畀呢位伯樂。