Foliday快樂旅遊概念

放假旅遊當然希望開心，所以我同復星旅遊文化（1992）管理層傾偈，講起佢哋嘅「快樂每一天」（Everyday is Foliday）理念，真係要問清楚何謂Foliday，點解佢哋嘅旅文假期會零舍快樂？

首先，香港地無論老闆定打工仔都係日忙夜忙，所謂忙裡偷閒放一個假，之前要趕工做定所需工作，返嚟又要處理堆積嘅事情，加上中間可能要回覆電郵短訊，如果帶同小朋友更加要兼任家傭，匆匆忙忙就過完一個假期。所以有人覺得放假不但充唔到電，仲可能有假期壓力。唔係誇張，美國一個精神健康協會做過研究，假期中出現憂傷甚至抑鬱徵狀，疲倦和家庭關係緊張等都係主要原因之一。

Work hard, play hard並唔係我杯茶，我好享受工作，亦唔介意出外旅遊時要處理公事，只係有時人在旅途比較麻煩。其實對於新經濟之下呢一代人，返工和放假嘅界線亦逐漸模糊，可以「家中辦公」，當然可以「假中辦公」，於是休閒度假酒店應運而生，畀客人可以hea住放假。假如客人有小朋友又想自己靜靜哋休息或做少量工作，有活動包埋嘅度假村亦好受歡迎。

復星旅文係全球最大休閒度假村集團，因應現代旅客需要聚焦休閒度假旅遊，旗下有Club Med以及三亞亞特蘭蒂斯酒店。公司強調「Foliday」，我覺得除咗代表「復星Fosun Holiday」之外仲有「Fun」嘅元素，因此公司以「快樂」作為業務策略之一，旗下品牌加埋合作夥伴如太陽馬戲等，發揮協同合作。

Club Med嘅全包式旅遊服務，所有消費包晒喺package裡面，接送、住宿、餐飲同活動之外，仲有託管服務，可以幫客人解決旅行前處理繁瑣雜項嘅煩惱，入住後大人有大人嘅活動，小朋友可以託管亦可以參加適合佢哋嘅節目。Club Med有四十年託管專業經驗，可依據小朋友年紀提供唔同活動。聽落好適合一家大細去玩，雖然我自己未去過，但話唔定遲下可以同孫仔孫女去體驗下。

另外，三亞亞特蘭蒂斯酒店坐落海棠灣國家海岸，以海洋為主題。項目喺舊年四月開業，係全球第三間及中國第一間亞特蘭蒂斯度假勝地。公司留意到內地消費升級，對旅遊產品需求有所改變，所以打算將消閒旅遊經營模式伸延到中國其他地方。

集團二○一八年全年業績成功扭虧為盈，賺三億元（人民幣，下同），上年同期蝕約兩億元。收入近一百六十三億元，按年增長三成七，毛利五十二億元，按年急升八成六。業績理想主要由於Club Med經營表現進一步改善，加上三亞亞特蘭蒂斯上年四月開業後嘅貢獻。Club Med一八年營業額升百分之八，經常性經營溢利增長近四成二；度假村亞太地區客量增長一成四，其中大中華客增長近二成二。最重要係公司推行快樂數字化項目，令客人滿意度提升，至能鞏固品牌令增長持續。