![](http://eastweek.my-magazine.me/tmp_images/article_images/86072/db67a80c3b84c4e5c9f43488fb05840ee0232fdd.jpg)
擊退前列腺癌二期 鄧達智:我已立了平安紙
現年六十歲的著名時裝設計師鄧達智(William),自一四年成功打敗乙結腸癌後,去年八月再度收到噩耗,確診患上前列腺癌二期,今年三月初進行長達八小時的切除手術後,成功擊退病魔,現正康復中。
去年六月才與同性醫生伴侶陳梓欣(Clement)結婚的他,直言確診患癌初期,不敢告知對方真相,並早已立下平安紙,做好離開的準備。
「生老病死係人生必經階段,我幾位最愛嘅屋企人同死黨都已經喺天堂,我真係唔介意同佢哋見面,我已經寫低咗平安紙,如果生命有一日話我知要走喇,我都無悔此生!」
同性伴侶Clement則坦承,曾為此事偷偷哭了,無論結果如何,也會遵守結婚時的承諾:「繼續陪佢走下去。」
![](http://eastweek.my-magazine.me/tmp_images/resources/86072/1.jpg)
鄧達智留院一星期後,已回家休養,正計劃下月生日與伴侶陳梓欣飛往越南胡志明市慶祝。
患難見真情
自從四年前成功擊退乙結腸癌後,鄧達智每年都會做身體檢查,去年八月發現前列腺位置有約一厘米大的腫瘤,屬第二期前列腺癌。得悉第二次患癌消息後,他的表現相當冷靜。
「最初頭三個月我都當無呢件事,想獨自去面對困境,唔想伴侶因為我有病而特別關心我。後來因為我腹部隱痛,再去照內窺鏡,先至話俾佢(Clement)知。佢幫我搵咗兩個醫生朋友同我做手術,好好彩癌細胞無擴散,手術後幾日,我已經行得走得,亦無失禁同性功能嘅問題出現,醫生都話我勁!」
手術住院連磁力共振及抽組織療程,共花了八十萬。他直言大病過後,最大心願只想每日回家與伴侶陳梓欣煮飯食。
「佢對我嚟講好重要,不但俾我專業嘅治療意見,仲係我嘅精神支柱。我從來都無經歷過一段好深入嘅感情關係,o依家終於有,我當然希望可以同佢生活得耐啲,陪住我走多一段時間!」
![](http://eastweek.my-magazine.me/tmp_images/resources/86072/2.jpg)
當日為病人做完手術,急趕到醫院探病的陳梓欣,樂觀面對伴侶病情:「如果連醫生都消極,病人又點會積極呢?為William做手術嘅醫生係我舊同事,我放心交俾佢。」
![](http://eastweek.my-magazine.me/tmp_images/resources/86072/3.jpg)
今年情人節,陳梓欣於海洋公園海龍王餐廳內,潛入大魚缸,拉起「I Love You」橫額,當眾向William驚喜示愛。William在ig分享照片,男人的浪漫。