佘媽搵猛男按摩

佘詩曼媽媽Lily（佘媽）喺七十年代曾經係港台DJ，而有個視后乖女嘅佢，一早已經唔使做，退咗休。佢曾經同東姑講，以前好辛苦咁湊大三個仔女，o依家係收成期。

究竟佘媽，收成咗啲乜？佢就坦言曾經有一年阿女送咗幢三層高嘅村屋畀佢，做母親節禮物；另一年就送車。至於阿仔都有送錢畀佢，所以佢真係可以印印腳唔使做。

雖然大把錢使，但係佘媽都好慳家。日前，東姑去深圳修甲，就咁啱坐喺佘媽嘅隔籬。呢度整gel甲，手加埋腳都只係二百蚊人仔，而佘媽好識歎o架，仲搵咗個猛男師傅嚟按摩，加埋貼士都只係五十蚊，合共盛惠二百五十蚊人仔，就已經有大爺咁樣嘅服務，非常合乎經濟效益。

佘詩曼因為幼年喪父，由媽咪含辛茹苦湊大，所以兩母女關係親密。

佘媽一頭純天然嘅白髮，坐喺修甲店好搶眼，好難唔認得佢。

除咗修甲，佘媽仲搵咗一個猛男幫佢按摩，好受力嘅佢，仲要師傅出動工具先搞得佢掂添。