梁芷珊（Canny）自去年與博美集團主席羅傑承離婚後，去年底搬離前夫的六千呎豪宅，入住大坑道的二千二百呎新居過新生活。

現時獨居的她，不但桃花盛放，極速撻着法籍三星米芝蓮廚師Olivier，更擴充新公司，專門打理運動市場推廣業務，她直言，新居入伙後，狀態大勇。

「囡囡去咗英國留學，得番自己一個人住，我都嫌間屋太大，原本打算完咗租約就唔再租，但住落發現，呢區旺中帶靜，景觀夠開揚，真係好舒服，做嘢都特別有靈感，人都開心好多。」

她笑言屋企似陳列室：「我之前住喺山頂，屋企成個陳列室咁，枱面唔可以擺任何嘢，雖然呢度已經比較warm啲，但我個人都唔係咁鍾意擺設，所以都有啲似showroom。」

環保至上

梁芷珊與羅傑承的十五年婚姻雖然畫上句號，但兩人依然維持友好關係，她透露前夫不但給予兩母女豐厚的贍養費，更送她物業自住，就連現時居住的單位租金，都是前夫一手包辦。

「羅生知我雜物多，打算買個三至四房嘅單位俾我哋，但我工作太忙，無時間去睇樓，所以租住樓先。我只有一個要求，就係想近公司，呢度返公司揸車只係幾分鐘，而且一梯一伙，私隱度高。屋內夠光猛，個view又靚，地方夠晒闊落，我都無點考慮，就決定租喇！」

崇尚簡約的梁芷珊，不但沒有花錢裝修，家中大部分擺設更是購自二手店及沿用舊有家具。「我唔鍾意浪費，以前搬屋有好多舊傢俬都仲擺喺倉，o依家可以大派用場。客廳嘅木製傢俬都係二手貨，係個外籍朋友搬屋時賣俾我，一萬二千蚊已經有晒餐枱、餐椅、電視櫃、鞋櫃同書枱，我平時唔會請客，連餐具都係用IKEA，用爛咗先換。」

她早前新添了一張Kartell膠枱放在客廳，但其男友卻很嫌棄：「我男朋友同我講呢張枱又硬又薄又膠，叫我唔好買，我就話佢唔識嘢，張枱係意大利嘢，有彈性之餘，用廿年都會咁透明。」

客飯廳幾乎沒有太多藝術擺設，惟獨在飯廳放了一幅「He Loves Me」掛氈：「係一零年喺連卡佛買嘅Paul Smith掛氈，質地既厚又輕，我唔鍾意掛喺牆上面，所以就咁擺咗喺櫃上。」

 

Hermès房

屋內設有三間睡房，梁芷珊及女兒各佔一間，另一間則改作為衣帽間。梁芷珊笑言，早在廿年前她已是Hermès擁躉，收藏了過百個名牌手袋。「我未結婚之前有一個男朋友同我講過，買嘢一定要買最靚，聽落好似好奢侈咁，但我花錢買一個靚嘢珍藏或長用， 好過買廿個平嘢粗用，所以九八年我仲係做填詞嗰陣，已經買咗第一個Hermès，到o依家個盒已經發晒霉，但個袋都仲係新簇簇。」

她會將手袋按顏色、大小及牌子分門別類，盒外更貼有相片，方便識別。「我平時着衫鍾意素色，多數都着黑、白、灰三色，惟獨啲袋colourful啲，可以用嚟襯衫。平時喺屋企無嘢做，我就會去執袋，因為我有強迫症，所有嘢都要執得整整齊齊先安樂，而且亦係我唯一唔使點用腦嘅時候，算係一種relax。」

梁芷珊只放咗一部分手袋在衣帽間，其他則放在貨倉內，由入門價三、四萬，到五十萬的款式都有。

她常用Hermès Victoria和Garden party兩個系列的手袋:「貪佢夠大，方便開工用。」

梁芷珊不想屋企太過空白，於是在客廳「故弄玄虛」，放了一張乍看是畫，實質原來是椅子的擺設：「十幾年前以八千蚊買返嚟，貪佢夠晒好玩得意。」