安德尊 李錦聯狹路相逢又「開拖」

上周二（十月九日）係喬寶寶大仔結婚嘅大喜之日，呢位好老竇仲幫囝囝搞咗場中式婚宴， 專門招待新老爺嘅圈中好朋友。向來好人緣嘅喬寶寶，可以話相識滿天下，東姑當日所見，唔少藝人朋友都紛紛到賀。

當中，仲有一對「久別重逢」嘅鬥氣冤家，就係人稱「大王」嘅安德尊、同埋廚藝精湛嘅「李師父」李錦聯喇！話說佢哋早年合作婦女節目《都市閒情》時，已傳出不和，仲有傳試過發生肢體衝突添。三年前，佢哋激罕再合體拍攝〈今晚食乜餸〉環節，節目中，兩人繼續不斷互寸、單打；就算之後無綫食住噱頭，搞咗個新節目《區區開伙》畀佢哋大鬥法，都充滿火藥味！

不過，自從去年李錦聯離開TVB之後，呢對冤家再冇乜碰頭機會，難怪喺婚宴上一見面，兩人即刻情不自禁，差啲又再擦出「火花」。話說，當時大王揸住電話同朋友影緊相，李師傅就好似撩交打咁，主動行埋去做「攝石人」；而李師傅仲鬼鬼馬馬，揸實拳頭作狀要打大王。不過，兩人一邊打、一邊又攬頭攬頸，仲笑騎騎唇槍舌劍互窒互寸，東姑真係睇唔穿佢哋真仇定假friend，關係認真撲朔迷離。

事後，東姑打電話問番李師傅，佢話同大王差唔多兩年冇見，嗰日諗住影番張相擺上社交網，話畀大家聽佢哋和好如初，點知大王唔知貴人善忘定真係嬲咗，到o依家都未傳番張合照畀佢喎！

三年前，兩人激罕再合體拍攝〈今晚食乜餸〉，節目中，佢哋不斷互寸、單打，充滿火藥味。

李師傅主動走埋去大王坐嗰圍枱度打招呼，仲撩對方一齊影番張合照。

呢對鬥氣多年嘅歡喜冤家，一見面就火藥味濃，李師傅仲作狀要拳打大王添。

喺眾目睽睽之下，佢哋作狀「開拖」，仲笑騎騎互窒、互寸對方。

李師傅認真鬼馬兼抵死，死都要握緊拳頭扮打大王影相。