謝賢另類服侍
八十二歲嘅謝賢（四哥），德高望重，向來享有好高嘅江湖地位，出到街有邊個唔識佢呀？邊個唔畀面佢呀？人人都一定敬重佢七分。
好似早前東姑喺中環置地廣場外，就見佢同埋一個白頭朋友，企喺街度等司機揸架七人車過嚟。而例牌鍾意雙手插袋，擺晒甫士chok晒嘅四哥，期間，竟然連講電話都有身邊友人服侍，幫佢揸住電話擺埋耳仔邊，認真尊貴！
之後，又有途人上前向四哥「集郵」，雖然，佢照樣雙手插袋姿勢不變，但係都笑容滿面親切任影，呢啲真係永恆巨星嘅風範喇！
友人將電話擺埋四哥嘅耳仔邊，唔使佢自己拎電話，照顧好周到。
Chok咗大半世紀嘅四哥，聽電話都有人服侍，隻手可以繼續插袋擺甫士。
期間，有粉絲見到四哥上前向佢「集郵」，佢都好親切歡迎。
