每逢假期，香港人總愛起飛，同親友出埠去旅行，不過機位總是不似預期，即使搶到飛，但經濟艙坐得又逼又唔舒服，有時再delay幾粒鐘，真係谷到一肚氣。

富豪級名人就冇呢啲煩惱，只要登上專屬私人飛機，想飛東西南北全由自己話事，加上機艙內裝潢豪華，梗係要飛一次晒一次喇，咁先值回「票」價吖嘛！

周汶錡新機試搭

經常陪法籍老公Julien返鄉下探親嘅周汶錡 ，早前就帶埋大仔Jacques去咗法國，講到明覺得「追飛機位好煩」嘅佢，行頭立即升格，喺當地坐私人飛機去巴黎玩，睇Jacques第一次試搭已經咁興奮，就知呢次旅程有幾咁開心！

 

黃婉佩空中套房

唔好講話搭私人飛機，連頭等都未坐過嘅大眾，當然想八卦下私家機有幾咁豪華。拜新加坡富商老公David所賜，平日搭開私人飛機嘅前2R組合成員黃婉佩，早前同家人去旅行，試坐A380空中客房。「好開心今次同老公及囡囡Cara一齊搭A380，我哋將兩間套房合二為一，入面有雙人牀、兩張躺椅同大浴室，好正。」

 

 

趙薇專機接送

當你身家有六十億人仔，出手何止闊綽，直頭離晒地都得。早年趙薇同富商老公黃有龍豪擲約四千二百萬港元收購法國葡萄酒酒莊，一家三口經常去法國度假，而前排去法國出席晚宴，仲出動到私人專機，更順路接送埋劉詩昆兩個弟子去做文化交流，令機內奢華嘅裝潢意外曝光，不過土豪味咁濃嘅？