阿翁秘傳廚藝 群星齊齊歎
《東周刊》與富豪酒家老闆翁仰光(阿翁)日前聯手,送出二千元一位的「豪門鮑魚夜宴」,讓《東周刊》讀者同樂,阿翁更邀約了幾位明星好友麥長青、向海嵐、盧宛茵以及謝雪心等識食之人,陪讀者一同齊嘆鮑魚及靚酒。
阿翁當晚即席親授煮鮑魚雞煲之絕技,心姐嘆為觀止,最後由向海嵐「美女廚房」上身,即煮「鮑魚汁撈稻庭麵」,讓各位讀者食到嘴舔舔,豎起手指大讚好味。
群星齊向阿翁學習煮鮑魚秘技。
大「鮑」口福
翁仰光與千金翁文敏,豪請幾位明星好友,包括:麥長青(麥包)、向海嵐(Anne)、盧宛茵(Madam Lo)以及謝雪心(心姐),豪歎鮑魚預祝中秋佳節,有六位幸運兒讀者就大飽口福。這晚十一道菜,有四道都有大大隻鮑魚,每位價值約二千元,阿翁大爆「砂鍋鮑魚炆雞煲」選用元朗新鮮雞,肉滑帶濃郁雞味,非一般急凍雞可媲美。當晚阿翁即席親授煮雞煲絕技,心姐帶頭站一旁細心學師,阿翁笑指:「整呢個煲唔使點樣落油,首先煎香啲雞皮,雞皮自然會滲出啲雞油,咁樣雞味會濃郁好多,然後加啲配料,例如蔥、姜,之後先加罐頭鮑魚,呢個餸睇嚟好複雜,其實好簡單,十幾分鐘搞掂,最啱節日整畀屋企人食。」
三個女人一個墟,她們一碰頭,傾到雞啄唔斷,仲要不停影自拍。
今次阿翁豪送六位、每位價值二千元的「豪門鮑魚夜宴」給《東周》讀者,各種豪飲豪食的活動,陸續有來,大家拭目以待。