朱李月華與魚蛋粉的緣份

本身喺鴨脷洲長大嘅金利豐集團總裁朱李月華（見圖），一直鍾情漁村風情，對魚蛋呢款地道小吃更有研究。

早前佢喺銅鑼灣Franck Muller表行三樓貴賓餐廳搞飯局，其中一道以魚湯浸燕窩，就勾起佢唔少回憶。原來朱太好喜歡吃魚蛋湯粉，會周圍試食，講得出邊間魚蛋彈牙邊間鹹過頭。香港仔聞名嘅謝記魚蛋佢以前就經常食，仲曾經有意接手經營。佢本身同老闆好熟，當年老闆榮休時，佢唔想謝記從此消失，曾提出接手來做。不過老闆思前想後，話要做靚魚蛋，一定要搵狗棍等幾種魚去打，而現時靚食材愈來愈難求，唔想日後品質唔同影響名聲，不如由它光榮結業算了。

提及手表市道，朱太索性叫同事攞幾盤名表上來畀佢一路食一路講。

朱太呢排人逢喜事精神爽，早前剛同好友去濟州慶祝完她六十歲生日及與丈夫朱沃裕結婚三十五周年，同時Franck Muller在濟州店嘅開幕。佢話香港鐘表市道唔錯，亦看準濟州有市場，所以越洋開店。

朱太投資樓股都有心得，席間有人請教她對後市看法。佢話認識唔少朋友都變得十分謹慎，有些朋友更已沽咗唔少貨，揸番現金最穩陣。樓方面，佢話最辣一招其實係市場，只要息口持續向上升至四厘，樓價就好有可能應聲而跌，而o依家佢覺得樓價正在調整中。換言之，都係揸現金，等機會。

講番銅鑼灣Franck Muller表行呢間餐廳，原來有兩層，一層做西餐，平日午間好多OL去食，百幾蚊個餐在銅鑼灣區唔算貴；而另一層就做中菜，多數用來請客用，唔少城中名人都做過朱太嘅座上客。