跟結婚六年的麥雅緻育有一對子女的張穎康，為了讓老婆可以專心湊小朋友，一力承擔養家重任。近年獲無綫力捧的他，搏命開工，早前同時連踩兩套劇後，最近又日以繼夜趕拍重頭劇《解決師》。

日前凌晨時份，本刊便發現他為《解》劇在長沙灣開工，拍攝遏止劈友打鬥場面。等候roll機期間，他為打發時間，忽然郭富城﹙城城﹚上身，在水馬上大唱〈對你愛不完〉。「自從有咗細路之後，個人都變咗『低能獸』，開工都改唔到呢個低B狀態。」嘻嘻哈哈完一輪，誰不知轉頭才拍了幾個鏡頭，他卻在刀光劍影下，前額中了招。

大女小豆早前戴着金色假髮扮Elsa，十分可愛；而自認「低能獸」的張穎康，亦戴起假髮扮嬌俏。

自娛打發時間

一二年，張穎康跟《東張西望》主持麥雅緻結婚後，一四年誕下囡囡張雅喬（小豆），為湊成「好」字，去年再追多個仔張迅橋（小花生）。出名是好老公、好爸爸的他，近年一力孭起搵錢這個重任。早前，他已連踩兩劇《包青天再起風雲》與《十二傳說》，曾試過為趕拍攝，三日兩夜有家歸不得。近日，他又為無綫重頭劇《解決師》，密鑼緊鼓開工；劇中，他與馮盈盈有感情線，飾演高級督察。日前凌晨時份，他便於長沙灣瓊林街，拍攝一場遏止黑幫的劈友場面。

當晚由零時開始拍攝，現場早已聚集了近五十名手持「架生」，準備劈友的臨時演員。正當武術指導在場指揮各人動作時，站在水馬上等候的張穎康，突然郭富城﹙城城﹚上身，載歌載舞大唱〈對你愛不完〉，相當惹笑。「生咗細路之後，個人都變咗『低能獸』！平時我喺屋企同啲仔女玩得多，佢哋一見到我做低能嘢，就會哈哈大笑，習慣咗呢種生活模式。所以未埋位時，我都會做啲低B嘢自娛，拍到朝早六點，梗係要癲吓、玩吓嚟打發時間啦！」他隨後笑着解釋。

日前凌晨，張穎康為新劇《解決師》，站在水馬等候roll機期間，忽然跳晒舞，唱起郭富城的〈對你愛不完〉。

張穎康不慎於拍攝時被割傷前額，猶幸只屬皮外傷，又有女兒小豆呵番。除額頭外，他表示在排戲時，手掌已中過招。