張新悅大肚臨登逼巴士

婚後退出娛圈嘅張新悅（Nicola），先後生咗三個囡囡Lucy、Lily同Leah，早前宣佈意外懷有第四胎，一樣都係女。四十二歲嘅佢，已講明封肚唔會再生，佗住BB已經九個月，大肚臨登隨時生得。早前，東姑咁啱喺置地廣場，見到腹大便便嘅佢，約埋一個女性朋友喺餐廳high tea。見佢雖然個肚變得籮咁大，但係手腳仍然纖瘦，再加上個樣幾乎冇乜變，大肚婆嚟講，真係keep得實在太好。

可能因為呢位大肚婆，有個做區議員嘅老公楊哲安嘅悉心照顧，所以佗B都靚過人。東姑見佢茶敍之後，轉往鄰近嘅商場，原來就係會合廿四孝老公，相信楊生係專程嚟接埋孕妻一齊返屋企。

最難得係佢哋老夫老妻，居然仲鬼咁黐纏，一時十指緊扣，一時又四目交投，兩個傾偈講笑，甜蜜互望，差啲「閃」到東姑眼都盲；最終，佢哋上咗一架巴士返回半山嘅寓所。雖然東姑知佢哋家有七人車又有司機，但係Nicola同老公都宣揚開環保，加上有情飲水都飽，兩公婆咁鬼恩愛，拍下拖搭下巴士咪當情趣囉！

早前，Nicola將身穿三點式、出海時自拍嘅大肚孕照，放上社交網，唔少網友仲讚佢keep得好。

Nicola約埋朋友喺餐廳high tea，不過撐住巨肚嘅佢，似乎有啲「論盡」，仲搞笑到畀張枱卡住個肚。

大肚婆嚟講，Nicola手腳纖瘦，樣又冇乜大走樣，難怪靚孕婦同朋友餐後玩埋自拍。

廿四孝老公楊哲安窩心接埋孕妻返屋企，夫妻仲十指緊扣拖到實一實。

等巴士期間，夫妻四目交投喁喁細語，笑容仲甜到漏咁嘅樣，「閃」盲人！

楊家四條Queen，媽咪Nicola之外，三個囡囡分別九歲嘅Lucy、七歲嘅Lily同三歲嘅Leah，而遲啲孻女出世，名副其實「四千金」喇！