林日曦「腦細」車大解構

毛記葵涌（1716）上個月上市，錄得超額認購六千倍，成為港股史上嘅「超購王」，股價首日炒高見11.76元，較招股價1.2元，勁升8.8倍；不過，其後股價急挫，至上周五收市時，股價報3.34元。

毛記三大創辦人之一兼創作大腦，人稱「腦細」嘅林日曦（真名：徐家豪），身家隨住公司上市水漲船高，升呢成為億萬富翁，就算唔計持有嘅股份，根據公司上市文件披露，佢年薪都過百萬，認真富貴。

不過，東姑發現，佢就算搵錢豬籠入水，生活仲係依然咁貼地，好似佢揸咗幾年嘅日本車仔，車價十二萬有交易；而呢啲「平民」車，可謂完全唔襯佢今時今日嘅身份同地位。加上，佢司機位嘅座椅同背墊，用埋啲霉dum dum嘅舊衫包住，可能係為方便拆洗啩。此外，司機位隔籬嘅乘客座，則放咗一部迷你嘅無線吸濕機，估佢唔到平時嘅生活細節，會咁「師奶仔」囉！

至於「TV930」嘅車牌，東姑估計另有玄機，「TV」代表毛記電視，而「930」就係佢嘅生日日期，所以「TV930」應該就係佢個人代號喇！

「腦細」呢架日本車仔，車價約值十二萬，仲要600cc油缸，勁慳油抵用。

車牌「TV930」，應該係主理毛記電視，又喺九月三十日生日嘅「腦細」代號。

上個月，林日曦創辦嘅毛記以史上「超購王」掛牌上市，一度受到熱炒，股價更曾高見11.76元，不過後勁不繼，其後急挫。

 

司機位隔籬嘅乘客坐位上面，放咗呢個充電嘅無線吸濕器，以為只有「師奶仔」先識用添。