聰聰公關公司好富貴 租起全幢唐樓
土地供應專責小組今個星期將會展開為期五個月嘅公眾諮詢，關係到未來幾十年本港嘅土地政策，咁敏感又重要嘅議題，政府當然好重視，專登搵定公關坐陣。中標嘅兩大公關公司，竟然係上年特首競選中，分別幫林鄭助選嘅麥黃小珍所屬嘅世聯顧問有限公司，同埋幫鬍鬚曾助選嘅財政司司長前政助羅永聰（聰聰）所屬嘅「蘇杭街一號」。
兩間公司今次唔打對台，改為雙劍合璧。世聯規模唔細，中標一啲都唔出奇，但成立不足一年嘅「蘇杭街一號」短短時間已打響名堂令人嘖嘖稱奇。不妨從呢間公司班底研究吓有無蛛絲馬迹，該公司創辦人兼唯一股東聰聰憑去年特首選舉一役揚名，曾經畀林鄭公開挖角，話「阿聰做得非常之好，如果我選到，不如請阿聰加入我嘅團隊。」
但林鄭當選之後，聰聰都無加入政府，走去創業搞公關公司。今年一月正式開張時，仲請到鬍鬚曾主持揭幕儀式。該公司班底幾乎沿用特首助選團嘅陣容，三個董事分別係前︽蘋果日報︾記者盧勁業、廣告人鍾振傑（Stephen）同埋IT公司科域盈創（FevaWorks）。
呢四個核心成員，主玩社交媒體，好似做過十年記者嘅盧勁業，較為人熟悉係佢創辦嘅網站「攝影札記」；而鍾振傑係讀傳理系出身，係廣告公司「香港的」嘅創作總監，搵網紅「達哥」拍旅行社廣告就係佢諗出嚟；至於科域盈創嘅董事係柳宇澄，呢間公司曾經營運過高登討論區，唔怪得當年選舉時鬍鬚曾喺網上盡佔上風。
資料顯示，「蘇杭街一號」以辦公室地址命名，單係睇佢哋同事喺公司selfie嘅相，以為規模唔算大，但離奇嘅係，公司疑租用全幢寫字樓部分。土地註冊處資料顯示，呢棟物業有五層，除咗地下商舖，寫字樓共四層，業主係德洋有限公司，董事係全國政協楊敏德同佢個女潘楚穎。據報楊敏德喺選舉時曾經在各方面幫過鬍鬚曾嘅競選辦。
「蘇杭街一號」雖然屬初起步，但已接到唔少生意，曾幫「黑暗中對話」基金會，搵莊陳有同曾俊華拍宣傳片，兩人仲有開金口獻唱，喺網絡引起極大迴響。之後仲有幫公益金宣傳便服日，同埋幫國泰航空喺聖誕節宣傳，柯打可謂浪接浪。
聰聰（右四）因為特首戰為鬍鬚曾（右二）助選而名噪一時，早前夥拍多名助選團班底，租下上環蘇杭街一號經營公關公司，如此有財力，令人嘖嘖稱奇。
土地供應專責小組展開公眾諮詢勢成眾矢之的，難怪政府落重本請兩間公關公司打點一切，咁o岩特首選戰兩邊陣營嘅公關都中標。
